Видеоплатформата Јутјуб ги отстрани видеата од каналот на бразилскиот претседател Жаир Болсонаро, поради ширење дезинформации за пандемијата на коронавирусот.
Јутјуб во соопштението за јавноста соопшти дека одлуката е донесена „по внимателно прегледување“ и без да се зема предвид работата или политичката идеологија на Болсонаро, пишува Гардијан.
Екстремно десничарскиот воен капетан Болсонаро е критикуван за рекламирање недокажани лекови, ширење сомневања за вакцината против коронавирусот и избегнување на носењето маски.
Од кабинетот на претседателот сè уште немаат коментар.
Минатата година социјалните мрежи Твитер и Фејсбук ги отстранија снимките на Болсонаро поради кршење на условите за користење откако тој се спротивстави на препораките на светските експерти за јавно здравје.
На јутјуб-каналот на Болсонаро беа објавувани неделни видеа во кои тој ги повикува министрите, поставува прашања и зборува за своите непријатели.
За време на разговорите, кои исто така се појавуваат на неговиот фејсбук-профил, тој редовно изнесува сомнеж во поглед на сериозноста на вирусот и рестриктивните мерки.
