Коалиција Маргини се обрати во врска со најновите измени и дополнувања на Законот за основно образование и Законот за учебници, со кои, како што велат, се озаконува дискриминацијата и насилството, а се бришат темите за сексуално и репродуктивно здравје и родова еднаквост.
Обраќањето на Коалиција Маргини го објавуваме во целост:
„Додека умираат деца во рушевините на корумпираниот систем со децении, додека семејствата тагуваат, а луѓето прашуваат како дозволивме ова да се случи, власта во Собранието игра лов на вештерки против ЛГБТИК+ луѓето.
„Наместо правда, наместо одговорност, наместо решителна борба против екслоатацијата, и социјалната несигурност на граѓаните – тие нудат омраза. Наместо промена, нудат бришење – бришење на родовата еднаквост, на инклузијата, на заштитата од насилство и дискриминација, на правото на информации поврзани со сексуално и репродуктивно здравје. Бришење на нашите животи, на нашите страдања, на нашите светови на отпор и радост.
Немаат решенија за убиените деца, но носат законски измени за бришење на ЛГБТИК+ децата и насилството коешто го трпиме секојдневно. Немаат решенија за врсничкото насислство и силувањето на девојчиња од нивни врсници, но имаат законски измени за бришење на родовата еднаквост, сексуалното и репродуктивното здравје! Немаат решенија за социјалната неправда и сиромаштијата на работниците, но имаат фиктивни наративи за нас како непријатели на народот! Ова не е политика – ова е злосторство! Ова не е „мислење“, не е „идеолошка дебата“ – ова е отворен напад против ЛГБТИК+ луѓето, нивните животи и нивната безбедност!
Но, знаеме кои се тие. Ги знаеме нивните тактики, нивните лаги, нивните реторики на креирање паника и измислени непријатели.
И знаеме кои сме ние! Ние сме оние кои преживеале и покрај желбата на многумина да не’ нема, оние што не се плашат, што нема да дозволат ова да помине! Ќе продолжиме да ги градиме нашите безбедни простори, да се грижиме едни за други, да се организираме. Кога тие сакаат да не’ избришат – ќе се обидеме да бидеме погласни од кога било! Ќе бидеме на улиците, во училиштата, во секој простор што сакаат да ни го одземат. Ќе бараме одговорност. Ќе бидеме бескомпромисни.
Оваа битка не за сите нас.
Не само за ЛГБТИК+ заедницата, туку за сите деца и млади, за сите што се оставени без заштита, за сите што не прифаќаат да живеат во страв. Нема да дозволиме да не’ избришат, да не’ замолчат, да не’ заплашат.
Сега е време да станеме – силни, бесни и обединети!“, стои во обраќањето.
