Имаш работи што постојано ги преместуваш, но никогаш не ги користиш? Облека која „моли” да ја носиш, но е заборавена и едноставно зафаќа простор? Распар чаши кои не виделе пијалок со години? Стари ЦД-а со музика која не е по твој вкус? Столче кое се крие во шпаизот? Време е да расчистиш!, велат од Здружението за креативна одржливост „Комбо“, кое во соработка со Јуроп Хаус утре (5, април) од 10 часот организираат Маалски буљак во својот двор.
Заинтересираните ќе можат да дојдат, изнајмат штанд и со, тоа, да дадат нов дом на својата облека и стари предмети.
„Важно е да се дава шанса за втор живот на старите предмети бидејќи тоа ни ги спасува животните средини од дополнителни депонии, огромен проблем во нашата држава. Од друг аспект, на овој начин и се задржува некоја традиција во нашето општество на предавање на работи од една генерација на таа по нив, нешто што ние сметаме дека е битно за негување“, велат од „Комбо“ за Радио МОФ.
Дополнително, посочуваат тие, на овој начин се потикнуваат и другите од заедницата да размислат за своите стари предмети: дали можат да ги реупотребат, реставрираат и користат повторно, наместо веднаш да ги фрлат и заменат со нови.
„Откако го отворивме ‘Комбо’, сфативме колку многу луѓе всушност не ја ни знаат вредноста на она што го имаат дома, а од друга страна запознавме премногу кои имаат голем ентузијазам и за купување на предмети од втора рака, но и за реобмислување на оние кои веќе ги имаат. Она што се надеваме е дека вторите ќе станат се побројни, а првите ќе се инспирираат и приклучат“, посочуваат од „Комбо“.
Терминот Маалски бувљак го употребиле првично како едно оддавање почит на веќе постоечкиот Канта пазар или бувљак во Маџари.
„Затоа што секој кој бил знае дека тоа е едно посебно искуство, а од друга страна маалски бидејќи има за цел да ги собере на едно место луѓето од заедницата (маалото), но и секој кој сака заедничарење, за да се видат, дружат, разменат енергија и секако инспирираат меѓусебно. Веруваме дека доколку ова прерасне во традиција, би имало големо влијание врз еколошкото размислување на нашите сограѓани, но и проактивното учество, па на тој начин ќе се појават и други позитивни иницијативи кои имаат за цел да ја обединат и зајакнат заедницата“, велат од „Комбо“.
„Комбо“ веќе објавија и правилна на учество на Маалски бувљак.
Елементите кои ќе бидат изложени треба да бидат чисти (облеката испрана, елементите пребришани), а учесниците да пристигнат најдоцна до 9 часот, за да успеат да се наместат пред да почне настанот – од 10. Воедно, 300 денари е партиципација (штанд + пијалок). Сите заинтересирани треба да го пријават учество ТУКА.
Инаку, Радио МОФ веќе ја објави приказната за Комбо, кое се наоѓа во Железара, во скопската општина Гази Баба.
Местото е збиралиште на креативност, дружење и одржливост, водено од двете сестри – Ивана и Анастасија. Сите предмети внатре добија „шанса“ за втор живот, откако веќе служеле некому, сега служат за разубавување на просторот и за промовирање поеколошки начин на употреба.
[Видео] „Комбо“ – Локална приказна за дружба, креативност и одржливост
Бојан Шашевски
