Делегацијата на ЕУ и Europe House Скопје, во соработка со меѓународно признатиот македонски филмски композитор, музички продуцент и пијанист Дуке Бојаџиев го одбележуваат 9 мај – Денот на Европа.
Концертот ќе се одржи на 8-ми мај, со почеток во 20 часот.
„На специјалната вечер во градскиот парк во Скопје, Дуке и неговите еминентни гости, двајца раскажувачи и 20-члениот оркестар на Македонската филхармонија ќе ги изведат најновите дела од неговиот опус, дополнети со нови музички композиции инспирирани од професионалниот и приватен престој на Дуке во Франција и Шпанија во изминатиов период. Перформансот e спој на неговата оркестарска и филмска музика, фузија на традиционални вибрации од балканскoтo и медитеранскoто музичко поднебје, поддржани со нарација на вечната љубовна поезија на Руми на македонски и албански јазик. Уникатно искуство за Денот на Европа, проследено со мултикултурна музичка прослава на љубовта, мирот и единството“, најавуваат организаторите.
Музичари:
Дуке Бојаџиев – пијано/клавијатури/вокал
Специјални гости:
Бахрамџи – сантур/вокал
Медуса Одисеј – два диџеи/гитара/перкусии
Миријам и Иса – вокал
Наташа Петровиќ – наратор
Амернис Нокшиќи – наратор и
20-члениот оркестар на Македонската филхармонија, под диригентство на Ана Спасовска.
Влезот ќе биде слободен за сите посетители.
Концертот е дел од серијaлот настани во организација на Europe House со кои се одбележува 9 мај – Денот на Европа. Изложби, музички изведби како и регионална конференција за млади се дел од прославата. Повеќе детали за истите може да дознаете преку следниот ЛИНК.
