Групата „Next to Silence“ на 27 февруари од 21 часот ќе одржи концерт во клубот „Котур“.
„Овој концерт ќе биде ретка прилика да се слушне групата во живо, а на кого ќе бидат изведени повеќе композиции од нивните албуми“, се вели во најавата.
„Next to Silence“ е македонски џез состав кој функционира повеќе години и сочинет е од членови кои долго соработуваат со разни музички формации. Групата фаворизира специфичен џез израз кој не се вклопува во конкретни категории и истовремено интерактира со духовни и саркастични елементи.
„Поради својата посветеност да изгради сопствен звук, бендот има привилегија да ја издава својата авторска музика за престижната етикета на Скопскиот џез фестивал (СЏФ), што овозможува врвна афирмација на нивната звуковна уметност. Во таа насока излегува и нивниот последен албум за СЏФ Рекордс, именуван како ‘Рух’, а кој е мошне добро прифатен меѓу слушателите, и особено меѓу музичката критика која направи неколку осврти на ова комплексно музичко дело. Нивната умешност, сублимирана и во ова најново издание, не ретко е манифестирана и на нивните бројни настапи, што воедно ќе биде можност да се посведочи и на концертот овој четврток во Котур. На својот настап, освен материјалот од ‘Рух’, ‘Next to Silence’ во репертоарот ќе вклучат композиции и од нивниот претходен албум“, стои во најавата.
Составот „Next to Silence“ го сочинуваат: Кирил Кузмановски (саксософон), Ади Имери (гитара), Филип Димишковски (клавијатури), Драган Стојковски (бас гитара) и Гоце Наумов (барабани).
