Со оглед на тоа што деновиве температурите во целата држава се екстремно високи, а метеоролозите најавуваат дека во наредниот период ќе се уриваат температурни рекорди, Јавното претпријатие за хуман третман и благосостојба на животни „Лајка“ апелира до граѓаните да не ги забораваат животните и да обезбедат свежа вода пред нивните порти и влезови на згради, со цел да се освежат напуштените животни и птици.
„Препорачуваме да ја менувате водата неколку пати во текот на денот, за да биде што е можно посвежа. Замолуваме секако да се внимава на уредноста и не се нарушува комуналната хигиена“, истакнуваат од „Лајка“.
Тие сметаат дека ваквиот потег никого од нас не нѐ чини ништо, а од друга страна правиме големо хумано дело бидејќи напуштените животни и птици поради крзното и пердувите тешко поднесуваат високи температури, па затоа во недостиг на вода неретко паѓаат немоќни и зашеметени и страдаат од срцев удар.
„Исто така, апелираме до сите сопственици на домашни миленици да не ги изнесуваат животните на прошетка кога се високи температурите, туку тоа да го прават рано наутро или навечер. Сите оние сопственици кои чуваат миленици во своите дворови се должни да им обезбедат сенка, и свежа вода. Држењето на животните на ланец или изложени на сонце без да можат да се засолнат е мачење и кривично дело“, нагласуваат од претпријатието.
