Првото електронско пријавување за упис во средно образование во учебната 2025-2026 година трае од 14 до 17 јуни, а второто е на 30 јуни. Конечните ранг листи по двете пријавувања, училиштата ќе ги објават на 2 јули, информираа од Министерството за образование и наука (МОН).
Како и во изминатите учебни години, велат од таму, учениците ќе треба да достават хартиени документи до училиштата, а се прават напори од следната учебна година процесот целосно да се дигитализира.
„Општините имаа обврска да направат анализа на пазарот на трудот и да го известат Министерството за образование и наука за кадарот кој им е потребен. Врз основа на тие информации го креиравме конкурсот, кој е објавен на нашата веб страна и во печатени медиуми“, рече министерката Весна Јаневска.
По однос на полагањето на државната матура, министерката рече е дека оваа година дел од учениците ќе полагаат во холовите и спортските сали во рамки на училиштата, а дел ќе полагаат во амфитеатрите на најблиските факултети, заради поголема објективност на целиот процес.
Воедно, посочи дека е неопходно да има растојание од 1,5 метар помеѓу учениците, апелирајќи до нив „да не се вознемируваат од просторот каде ќе полагаат и да се фокусираат на подготовките“.
За ваквиот начин на полагање претходно потврдија и од Сојузот на средношколци, од каде рекоа дека можноста за учениците да бидат тестирани во нивните школи доаѓа откако седнале да разговараат со надлежните институции.
„По реакците (на средношколците), вака ја решивме целата ситуација, со цел да бидат исполнети желбите од учениците, а истовремено добро да бидат информирани околу целата државна матура“, посочи тој.
Државна матура ќе се полага во школите, а ако немаат просторни услови тогаш на факултетите
