Министерството за внатрешни работи се јави во врска со видеото што кружи на социјалните мрежи, на кое се гледа непрописно паркирано возило со скопски регистарски ознаки на територија на Дебар Маало во Скопје.
На видеото, се гледа претежно како млади лица бараат од луѓето што управуваат со „пајакот“ на Паркинзи на општина Центар (ПОЦ), но и од униформиран полицаец – да го соберат возилото бидејќи е паркирано буквално насред велосипедска патека. Дечките на снимката велат дека колата е на полицаец кој ја оставил додека седи во локалната кафана и се бунат кога добиваат одговор дека „е на службена должност“.
МВР во соопштението посочува дека конкретниот настан се случил на 22 март 2025.
„Имено, возилото е подигнато од страна на ПОЦ, а од страна на СВР Скопје преземени се мерки по член 63 став 6 од Закон за безбедност на сообраќајот на патиштата и на возачот на возилото С.К. издаден му е платен налог“, посочуваат од МВР.
Исто така, тврдат дека предметното возилото не е на полициски службеник.
„Во врска со постапувањето пак на полициските службеници при подигнувањето на возилото, веќе постапува Одделот за внатрешната контрола, криминалистички истраги и професионални стандарди при МВР и по завршување на целокупната постапка соодветно ќе ја известиме јавноста“, стои во соопштението на јавноста.
*Во првичното соопштение до јавноста, МВР испрати фотографија со скриена регистрација на возилото. Бидејќи се работи за јавен простор и прекршок што е потврден од самото МВР, сметаме дека е наша јавна одговорност и е јавен интерес да ја покажеме регистрацијата на колата.
Бојан Шашевски
