Над 300.000 работници во Финска денеска започнуваат со дводневен штрајк во знак на протест против планираните реформи на пазарот на труд на десничарската влада и предложените кратења на системот на социјална помош, пренесува Данас.
Компаниите и синдикатите рекоа дека штрајковите во четврток и петок се очекува да заглават голем дел од воздушниот сообраќај, да влијаат на производството на рафинеријата за нафта и да затворат многу продавници, фабрики и градинки.
„Планот на Владата е безобѕирен. Прво, правото на штрајк ќе биде сериозно ограничено, а потоа ќе се протуркаат остри намалувања“, изјави претседателот на најголемото синдикално здружение САК, Јарко Елоранта.
Во последниве месеци, синдикатите протестираа против владините планови да ги ограничи политичките штрајкови и да го олесни раскинувањето на договорите за работа.
Синдикатите истакнаа дека се подготвени за долга борба доколку е потребно, заканувајќи се со дополнителни штрајкови доколку владата не отстапи.
Сепак, владата, која ја презеде функцијата минатата година, инсистира на тоа дека Финска мора да ја зголеми продуктивноста и да го намали фискалниот долг.
Работниците што штрајкуваат сочинуваат околу 13 отсто од 2.29 милиони луѓе вработени во Финска, според официјалната статистика од 2023 година.
