Најголемото лизгалиште на отворено во светот можеби нема да се отвори годинава поради недостаток на мраз, а тоа би било првпат по пет децении да биде затворено, јавува Евроњуз.
За култното лизгалиште правилно да замрзне, во Отава, Канада беше премногу топло, а според „Environment Canada“, градот е во канџите на својата трета најтопла зима досега забележана.
Температурите се движат малку под нулата во поголемиот дел од декември и јануари. Таму обично е постудено, и температурите достигнуваат околу -5 до -10 Целзиусови степени.
„Мајката природа оваа година ни претстави голем предизвик. Благите температури го отежнаа создавањето добар, цврст мраз кој може да ја издржи тежината на нашата опрема и на скејтерите“, рече Брус Дивајн, менаџер на Националната комисија за капитал кој е одговорен за лизгалиштето.
За каналот да замрзне, температурите треба да се одржуваат стабилно на -10 до -20 Целзиусови степени речиси две недели. Во моментов, Дивајн вели дека мразот е премногу порозен и не е доволно квалитетен за лизгалиштето да се отвори.
Лизгалиштето, кое е со големина од 90 олимписки лизгалишта, се простира во должина од 7.8 километри низ центарот на Отава. Инаку, лизгалиштето обично се отвора на крајот на декември и дневно привлекува околу 22.000 посетители.
