Најмалку 50 вреќи ѓубре собрани во еко-акција на извидници од 23 европски земји и „Чист Охрид“

Околу 80 извидници од 23 европски земји, во заедничка акција со организацијата „Чист Охрид“ денеска го исчистија просторот околу Извидничкиот центар, реката Коселска и плажите во околината, информираат од „Чист Охрид“.

Оттаму посочуваат дека во акцијата собрале 50 вреќи ѓубре, а најмногу отпад од пластични шишиња, кеси, марамчиња, стакло, но и телевизор и пластични столови.

„За време на акцијата, пред извидниците и активистите говор одржа Катерина Василевска од ‘Охрид СОС’ за значењето и состојбата во која се наоѓа Охридското Езеро“, се додава во нивното соопштение.

Истовремено, тие посочија дека акцијата се организира еден ден по Меѓународниот ден на планетата Земја и упатија апел до сите граѓани да ја чуваат околината и постојано да работат на подобрување на животната средина.