Во канцеларијата на Народниот правобранител, утре, во периодот од 7 до 19 часот кога се одржува првиот круг од локалните избори ќе функционира бесплатната телефонска линија 0800-54321, на која граѓаните ќе можат да пријават било каква повреда на избирачкото право.
Исто така, оттаму информираат дека за граѓаните ќе бидат отворени сите седум канцеларии на Народниот правобранител во Скопје, Битола, Кичево, Куманово, Струмица, Тетово и Штип, со цел да им се помогне во остварувањето и заштитата на нивните избирачки права.
„Покрај на бесплатната линија, граѓаните ќе можат за заштита на своите права да се јават и на следниве телефонски броеви: Тетово: 044 344-082, Струмица: 034 329- 996, Кичево: 045 228-586, Битола: 047 242-310, Штип: 032 389-701 и Куманово: 031 431-488. Народниот правобранител, правата на граѓаните ќе ги штити со преземање на итни мерки за ефективно постапување од странa на надлежните органи во изборниот процес и другите институции кои се должни да им обезбедат заштита на нивните загарантирани права“, стои во соопштението.
Исто така, Хелсиншкиот комитет за човекови права вчера информираше дека канцеларијата на комитетот ќе биде отворена во текот на целиот ден, со цел да им овозможи на граѓаните да пријават повреда на избирачкото право.
„Комитетот ги охрабрува сите граѓани кои сметаат дека нивното избирачко право е повредено да го пријават случајот во канцеларијата на Комитетот, која се наоѓа на ул. ‘Наум Наумовски Борче’ бр. 83 во Скопје и преку телефонските броеви 02 3119 073 и 072 278 436. Покрај личното и телефонското пријавување, овозможена е и пријава преку е-пошта на helkom@mhc.org.mk. Пријавите преку е-пошта треба да содржат кратко образложение за настанатата повреда, локација (изборна единица и број на гласачко место) и време на настанување на повредата на избирачкото право. Граѓаните можат да ги поднесат пријавите наведувајќи ги своите лични податоци или анонимно“, стои во нивното соопштение.
На локалните избори на кои се избираат градоначалници и советнички листи за 80 општини и Град Скопје право на глас имаат 1.824.864 гласачи.
