Малата мечка сите истражувачи на сетилата на 9 октомври од 21 часот ги кани во Планетариум на концерт на „An еagle in your мind, номадско дуо за кое музиката е патување, постојана потрага по нови сонични хоризонти.
„An еagle in your мind“ доаѓаат од Франција, а според организаторите МКЦ и 5060, тие во интимата на скопскиот планетариум ќе донесат хипнотичен звук кој е органска спојка на фолк, психоделија, сакрална музика и апстрактен хип-хоп.
„Непредвидливост претворена во скапоцена доблест. Парадоксална алхемија на повеќе хетерогени елементи поддржани од шаренолик инструментариум кој вклучува индиски хармониум, бразилски перкусии, гуембри (акустичен бас со потекло од Западна Африка), бенџо, синтисајзер, ритам машина итн.. Љубопитни сме да видиме и слушнеме што ќе си понесат од Македонија“, велат организаторите на настанот.
Билетите се во строго ограничен број и достапни на билетарницата на МКЦ по цена од 150 денари (во претпродажба) и 200 денари (на ден на настанот).