Годината 2024 ја затвораме со фотографиите на Христијан Стоимилов, фотограф и основач на „The Click & Clips“.
„Пасијата за фотографија и видео се разви уште од најрана возраст, кога од големи режисерски имиња бев инспириран да го гледам светот преку објективот на уметноста. Како студент на Факултетот за Информатички Науки и Компјутерско Инженерство при Универзитетот Св. Кирил и Методиј, ги спојувам технологијата и креативноста преку мојата работа, созадавајќи уметност во која главниот акцент е на уникатноста“, вели Христијан за Радио МОФ.
Тој вели дека голем дел од неговата архива досега се фотки и видеа кои доловуваат знаменитости, прикажувајќи ја историјата, архитектурата и културата на различни нации.
„Со фотографии од Пирамидите во Гиза – кои ја прикажуваат древната египетска цивилизација, до елеганцијата на Виена – каде архитектурата и историјата се спојуваат во едно. Особено значајно место во мојата работа завзема Македонија која е позната по своето културно и природно наследство“, вели тој.
Радио МОФ започна со рубриката #НизТвојотОбјектив со цел да отвори можност за изразување, промовирање и поврзување на фотографи. Секој четврток објавуваме фотографија или фотографии од еден автор.
Сите заинтересирани за објавување, своите фотографии може да ни ги пратат на info@radiomof.mk, заедно со кратка биографија и кусо објаснување за контекстот на фотографијата. Фотографиите треба да опфаќаат различни општествени теми како екологија, дискриминација, цензура, млади, маргинализација, корупција, незадоволство и секојдневното живеење.
