Во пресрет на Новата година, „Буба Клуб Македонија“ на 23 декември ќе го организираат петто по ред новогодишно олдтајмер возно дефиле и дружба со пријателите од неколку клуба, со кои ќе продефилираат низ улиците на Скопје.
„Возното дефиле ќе почне од 17:30 часот од Зоолошка градина, ќе поминеме пред Влада, па ќе се упатиме кон сефаморите на ТЦ ‘Палома Бјанка’. Потоа преку Рекорд, Собрание ќе свртиме лево и поминеме покрај Олимписки базен по што ќе свртиме десно кон Железничка станица и ќе се упатиме се до крајот на булеварот Јане Сандански во Аеродром“, велат од „Буба Клуб Македонија“.
Потоа, на семафорите кај булеварот „Србија“ олдтајмерите ќе свртат полукружно и ќе се вратат по истата рута до семафорите после Железничка станица, каде ќе се упатат преку споредните улици на населба Пролет кон влезот на „Веро Центар“, каде возилата ќе се паркираат и ќе има собир.
„Сите кои се заинтересирани и сакаат да ги видат накитените коли во новогодишно празнично издание, ќе можат да го сторат тоа до 21 часот дента“, соопштуваат организаторите.