„О2 Иницијатива“ реагира на соопштението на Министерството за транспорт за измените на Законот за урбанистичко планирање, кој е ставен на седница во Собранието во понеделник, (12 август), по скратена постапка.
Од таму посочуваат дека се споменати 600 урбанистички планови заглавени во постапка, а не се спомнува дека изработката на тие урбанистички планови трае повеќе од 4.5 години и тоа по стари неважечки закони и правилници, со неточни параметри, зошто за тој период има нови податоци од пописот, има изградени линиски центри чии параметри не биле вклучени во планирањето, а сепак ги искористиле најголем дел од ресурсите и сл.
„Она што министерството за транспорт, односно оваа Влада сака е овие несоодветни планови да си продолжат да се изработуваат според стари неважечки закони и правилници до недоглед и да се донесат со неточни параметри, врз чија основа утре ќе се гради, не земајќи ја предвид сегашната изменета состојба. Впрочем, сегашниот закон не е пречка, зошто е јасен дека сите тие планови ќе ПРОДОЛЖАТ да се изготвуваат според сегашниот закон, како што и треба. Дополнително, климатските промени сè по жестоко нè напаѓаат со секоја измината година и наместо да се ревидира она што е планирано од претходно, битно е само да се гради“, реагираат еко-активистите.
Во реакцијата стои дека основна цел на законските измени е да се поедностават постапките во однос на градење и на катни гаражи.
„Она што се сака е да се гради без урбанистички план, само со проект, кој каде ќе му текне, без да се прашаат граѓаните кои живеат таму дали се согласуваат со локацијата, висината на градбата или не, без јавна анкета и без Советот на општина да има право да одлучи со гласање. Ова е отворање на врата на самоволие и хаос, кое не смее да се дозволи. Ајде тогаш да поедноставиме сè, ги укинеме урбанистичките планови и секој нека гради каде сака, како сака, колку сака. Не може под превезот на ‘јавен интерес’ да се прави урбанистичко-градежен хаос“, наведуваат од „О2 Иницијатива“.
Активистите посочуваат дека во соопштението на Министерството се потенцира дека сосема погрешно во јавноста се интерпретира одредбата каде се вели дека се брише можноста да се донесе урбанистички план без согласност од Министерството за транспорт и дека вистината е обратна, односно се укинува правото „молчењето е одобрување“.
„Да, точно е дека тој дел се брише за што сме сосема согласни. Но, не е точно дека погрешно се интерпретирале другите одредби кои исто така се бришат и за кои реагиравме. Одредбите кои велат дека одлуката со која се донел урбанистички план е ништовна, ако нема добиено согласност од министерството за транспорт, а министерот е должен да донесе забрана на примена на планот во рок од 5 работни дена, се бришат. Овие одредби се суштински за да се спречи злоупотреба и спроведување на планови кои не се валидни, а не да се чека некој да поднесе до Уставниот суд иницијатива и после години судот да донесе одлука, а во меѓувреме се изградило сè според тој план“, стои во реакцијата.
Според „О2 Иницијатива“ се бришат одредбите поврзани со обврската за обезбедување на потврда за урбанистичка усогласеност.
„Наведено е дека оваа одредба не може да се примени поради неусогласеност со актуелниот Закон за градење. Урбанистичката усогласеност е од големо значење и наместо да се избрише од законот, потребно е да се измени соодветно Законот за градење. Во спротивно неусогласени планови ќе се спроведуваат“, апелираат еко-активистите.
Посочуваат дека се брише и цел член каде се уредува дека урбанистички планови и документации кои не се усогласиле според Законот за просторно и урбанистичко планирање од 2005 и 2007 година и престанале да се применуваат во 2013 година, донесувачите биле должни да отпочнат постапка за изработување и донесување на урбанистички план.
„Општите акти кои се донеле во меѓувреме, престанале да важат со денот на отпочнувањето на примена на сегашниот закон, а донесувачите биле должни да отпочнат постапка за изработување и донесување на урбанистички план за село. Не може да се остават на сила општи акти кои не се усогласени со сегашните стандарди и норми и да нема изработено урбанистички планови за одредени подрачја уште од 2013 година. Потребни се нови урбанистички планови за овие опфати и не може да се остават неуредени како до сега“, алармираат тие.
Од организацијата апелираат дека урбанистичките планови треба да воведат ред, а не хаос и не може да се дозволи изработка, спроведување на планови кои не се соодветни и изградба на објекти како катните гаражи без нив.
„Доволно е хаотично и без тоа, дополнителен хаос не ни е потребен“, велат тие.
