Од јавно обвинителство Битола до Основниот суд во Битола денеска е поднесен oбвинителен акт против едно лице за кривичното дело – загадување на животната средина и природата, а исто така обвинение е поднесено и против правното лице АД за производство на електрична енергија – Електрани на Северна Македонија, соопштија од Јавното обвинителство.
„Во периодот од јануари 2015 година до 7 февруари 2017 година, на обвинетиот како одговорно лице во правното лице – директор на РЕК Битола, подружница на АД за производство на електрична енергија – Електрани на Северна Македонија му било доверено извршување на законските и подзаконските прописи за управувањето, користењето и располагањето со имотот, раководењето со производниот потфат и надзорот, во име и за сметка на обвинетото правно лице“, стои во соопштението на обвинителството.
Оттаму објаснуваат дека правното лице не се придржувало кон прописите за заштита на животна средина и дозволил користење на погон кој ја загадува животната средина.
„Спротивно на член 6, член 13, член 14 и член 15 од Законот за заштита на животната средина, дозволил отпепелувањето на пепелта која се добива во процесот на производство на електрична енергија од јаглен во РЕК Битола на одлагалиштето за пепел да се спроведува без да се почитуваат утврдените правила и процедури за навремено покривање на пепелта со јаловина со континуирано и постојано работно ангажирање на потребната механизација на одлагалиштето“, се дополнува во соопштението.
Во соопштението се објаснува дека и покрај тоа што Секторот за отпепелување во рамките на ПЕ Термоелектрана при РЕК Битола постојано барал ваква механизација, како директор на РЕК Битола обвинетиот не презел мерки за непречено обезбедување на механизацијата на лице место.
Велат дека, како резултат на тоа, на одлагалиштето во наведениот период биле одлагани големи количини непокриена пепел кои во март 2017 година достигнале површина од 50.000м2.
„При воздушни струења пепелта се разлетувала во околината, со што е предизвикана опасност за животот и здравјето на вработените во РЕК Битола и луѓето кои живеат во населените места околу РЕК Битола. Имено, летечката пепел која се создава со согорување на јагленот содржи сулфур диоксид, азот диоксид и тешки метали чие вдишување предизвикува влошено респираторно и кардиоваскуларно здравје на населението кое работи и живее во близина на термоелектраните како РЕК Битола“, соопштуваат од обвинителството.