Македонскиот олимписки комитет отвори повик за избор на официјалната маскота на 18. издание на Европскиот младински олимписки фестивал (ЕМОФ) 2025, кој ќе се одржи од 19 до 26 јули следната година во Скопје.
„Граѓаните од сите возрасти од денеска ќе добијат уникатна можност да го изберат симболот кој ќе го претставува младинскиот спорт и ќе ги инспирира идните генерации спортисти. Повикот е дел од настојувањето да се вклучи јавноста во процесот на креирање на фестивалот, правејќи го настанот инклузивен и блиску до срцето на македонскиот народ“, велат од Македонскиот олимписки комитет.
Маскотата ќе биде симбол на вредностите на ЕМОФ – единство, пријателство, почитување и спортски дух, и ќе биде присутна на сите настани и промоции поврзани со фестивалот. Понудени се три опции за гласање, маскотите, Перо, Томе или Shiny. Вашиот глас може да го пријавите на овој ЛИНК.
„Изборот на маскотата за ЕМОФ 2025 не е само одлука, туку можност за сите нас да создадеме симбол кој ќе биде дел од историјата на овој значаен спортски настан. Ги охрабруваме сите граѓани да учествуваат во изборот и да го дадат својот глас за маскотата која најдобро ги претставува младинската енергија и спортската култура на Македонија,“ изјави Даниел Димевски, претседател на Македонскиот олимписки комитет.
Гласањето ќе се одвива онлајн на официјалната веб-страница на фестивалот, а маскотата која ќе добие најголема поддршка ќе биде прогласена за официјална на ЕМОФ 2025. Процесот на избор започнува од денеска (6 ноември) и ќе трае до 10 ноември 2024 година.
За повеќе информации и пристап до гласањето, посетете ја официјалната веб-страница на Европскиот младински олимписки фестивал 2025. Организатор на фестивалот е Град Скопје, а ко-организатор е Македонскиот олимписки комитет (МОК).
