Наместо на дневна основа, од следниот понеделник паричните средства за субвенциониран студентски оброк, ќе се исплаќаат одеднаш за шест дена во неделата, најави денеска Министерството за образование и наука (МОН).
Ова, како што потсетија од МОН е предвидено со последните измени на Законот за субвенциониран студентски оброк, направени на барање на студентските организации и здруженија, а во насока на унапредување на решението за користење на оваа системска мерка.
Студентскиот оброк од први март ќе се исплаќа на неделно ниво
„Министерството за образование и наука известува дека почнувајќи од следната седмица, секој студент кој го остварува правото на субвенциониран студентски оброк на својата трансакциска сметка ќе добива буџет во износ од 840 денари кои ќе бидат наменети за купување оброк, односно намирници за прехрана и ќе можат да се искористат од понеделник до сабота. На овој начин се зголемува практичноста на законското решение кое досега предвидуваше исплата на 140 денари на дневна основа“, велат од ресорното министерство.
Оттаму истакнуваат дека нема промена во условите за остварување на правото на субвенциониран студентски оброк и додаваат дека рокот за пријавување на студентите кои досега не го оствариле ова право или не ги исполнувале критериумите, е од први до петти секој нареден месец преку порталот e-uslugi.mon.gov.mk.
„Со оглед на тоа што примената на новото законско решение стапува на сила од 1 март, информираме дека секој студент корисник на правото, овој петок ќе добие средства за двата преостанати дена од седмицата, односно 280 денари“, велат од МОН.
Измените за субвенционираниот студентски оброк беа донесени на почетокот на февруари.
