Со почеток во 20 часот, утре (сабота) ќе се отвори изложбата „Забранети луѓе“ од Џон Илија Апелгрин.
Изложбата која ќе се одржи во Кинотека на Македонија, содржи црно-бели фотографии на музичари, кои се дел од книгата на Џон Илија Апелгрин, издадена за време на пандемијата со коронавирусот со ист наслов „Забранети луѓе“.
„Делото, кое е во издание на ‘Арс Либрис’, е своевиден книжевен документарец за незавидната состојба на дел од џез- и рок-музичарите за време на пандемијата со Ковид-19. Апелгрин покрај тоа што е автор на книгата, се јавува и како фотограф на црно-белите портрети на музичарите“, се посочува во најавата за настанот.
„Со фотографија се занимавам од поодамна. Љубовта ми се роди во Англија, кога го добив првиот фотоапарат ‘Пентакс асахи’, во 1989 година… Во моментот кога замреа микрофоните, силно ми зазвучи тишината во животот на ‘забранетите’, а фотографијата ми се виде како најсоодветна за „заробување“ на таа тишина во фотографиите и решив да ја раскажам нашата приказна на овој
начин“, објаснува Џон Илија Апелгрин.
Во книгата се застапени портрети на 14 домашни музичари, чијашто главна егзистенција се ноќните свирки и настапите во живо во локали, кои беа забранети за време на карантините и мерките за заштита за време на пандемијата. Фотографиите се портрети на музичарите застапени во книгата.
Меѓу нив се Благоја Антовски (тапани), Игор Атанасоски-Харе (гитара), Трајче Велков (труба), Калина Велковска-Кали (вокал), Зоран Костадиновски (гитара), Крле (вокал), Кирил Кузманов (саксофон), Џоле Максимовски (бас-гитарист), Андреа Мирческа (контрабас), Иван Петровски (гитара), Полина Тасева (сопран), Петар Ренџов (гитара), Гордан Спасовски (пијано), Арбен Бени
Шаќири (вокал) и Џон Илија Апелгрен (вокал).
„Апелгрен воопшто не помислил дека во паниката што настана од вирусот, независните уметници-изведувачи ќе бидат сосема заборавени и тргнати настрана од системот… Дека ќе бидат забранети ноќните свирки и настапите во живо во локали. Тој е еден од многуте музичари на кои со мерките за справување со пандемијата им беше забрането да настапуваат. Тие станаа ‘забранети луѓе’.
Објавувањето на книгата имаше солидарен, односно хуман аспект, за поддршка на музичарите чиишто ангажмани беа на најголем удар за време на пандемијата“, се додава во најавата за настанот.
Изложбата се поставува во склоп на фестивалската понуда на Скопско лето.
