Со проекцијата на италијанскиот филм „Несовршена доба“ во режија на Улисе Лендаро синоќа започна 7. Филмски фестивал за млади „Џифони Македонија“ во киното „Милениум“ во Скопје.
„Ентузијазмот што го гледам ми покажува дека иницијативата да се донесе филмскиот фестивал „Џифони искуство“ во Скопје, беше полн погодок. Среќни сме да гледаме како од година в година овој фестивал станува важен елемент од големото „Џифони“ семејство во цел свет. На овој начин ги зајакнуваме културните врски помеѓу Италија и Северна Македонија, потврдувајќи ги врските меѓу двете земји. Повеќе од 500 тинејџери, повеќе од 50 странски гости се во Скопје, многу филмови, многу иницијативи и настани, со фокус на специфични теми – заштита на животната средина и безбедната употреба на интернет“, истакна италијанскиот амбасадор во земјава, Карло Ромео, синоќа на отворањето.
Младите џифонци од Македонија му се заблагодарија на Клаудио Губитози, основачот и душата на фестивалот од пред 50 години, кој за жал, во последните денови од оправдани причини не можеше да дојде во Скопје. Директорот на фестивалот, Дарко Башески истакна дека иако Губитози не е со нив, неговиот дух е присутен.
„Јас се надевам дека „Џифони“ ќе биде приказна без крај“, истакна Башески.
На првиот фестивалски ден, посетителите на Фестивалот имаа можност да се запознаат со актерот и пејач Лука Чиковани, кој игра една од главните улоги во филмот „Среќата на Лазар“.
Чиковани е пресреќен што е гостин во Македонија. Вели од дете негов суперхерој бил Александар Македонски. Тој им објасни дека сосема случајно се нашол во филмот. Музиката е неговата прва љубов и окупација.
„Почнав да снимам кавери на познати песни на „јутјуб“ и изгледаа ужасно аматерски. Но, еден од нив некако го видела режисерката Аличе, која е многу почитувана во Италија и во филмскиот свет, ми се јави и ми понуди да одам на аудиција. Кога мајка ми, која е кинематограферка, слушна кој ме побарал, ми рече веднаш да и се јавиш. Имав многу стравови во првите денови на снимање, меѓутоа кога одлучив дека треба да се опуштам и да се препуштам на искуството, тогаш победив. Филмот ме промени како личност, ме научи дека сонот за слава, убави автомобили, облека е многу минлив и не е вистинскиот. Треба да и се вратиме на хуманоста. Големото его не убива сите нас. Мора многу да учите. Тоа го сфатив подоцна, откако завршив училиште, но секогаш можете да се посветите на она што сакате да го правите. Затоа сега планирам да одам во Лос Анџелес, да се запишам во актерска школа, за да научам повеќе“, вели Чиковани.
Џифонци вчера ја имаа привилегијата први да бидат ученици во патувачката училница Una vita da social – Живот на социјалните мрежи, која е дел од проектот „Поврзани генерации“ – Безбеден интернет центар, што го координира Министерството за образование и наука на Италија, а го реализира Одделението за безбедност во комуникациите при МВР. Патувачката училница денеска од 16 до 19 часот беше поставена пред „Скопје сити мол“.
Денеска на програмата беа и мастер-класови со „Fridays for Future“ и СОК Македонија – Светски обединети колеџи, а беше прикажан и филмот „Светлина“ во режија на Мартин Чичовски.