Фестивалот на креативен документарен филм „МакеДокс“ е во потрага по четвртата генерација на „Докуникулци“ на возраст од 14 до 18 години, кои сакаат да бидат дел од годинешната работилница за креативен документарен филм.
Во поглед на пријавувањето, од „МакеДокс“ посочуваат:
„Сними се себе си, со телефон, веб-камера или на било кој друг начин и преку видеото, кое не треба да е подолго од 5 минути, одговори на следниве прашања:
- Освен преку соништата, на кој друг начин бегаш од секојдневието?
2. Кога би можел да бидеш кое било животно или растение, што би избрал/а да бидеш и зошто?
3. Кое е твоето најрано сеќавање?
4. Кога би сретнал/а магаре што знае да зборува, што прво би ти кажало и зошто?
5. Кој документарен филм ти оставил најголем впечаток и зошто?
6. Која е приказната што сакаш да ја раскажеш и зошто е различна од останатите?
7. Што би издвоил/а за себе како важно, специфично, откачено?
Видеото испрати ни го на dokunikulci@makedox.mk преку WeTransfer. Уште подобро, доколку си во можност, прикачи го на VIMEO или YouTube, заштитено со лозинка, а нам испрати ни ги линкот и лозинката“, велат од „МакеДокс“.
Повикот е отворен до 1 јули 2022, a резултатите ќе бидат објавени до 7 јули 2022 година.
Работилницата ќе биде распоредена во четири сесии и ќе се случува за време на:
– Патувачкото кино на „МакеДокс“ (20-24 јули, т.е. 5 дена)
– Филмскиот фестивал „МакеДокс“ (18-25 август т.е. 8 дена)
– Две есенско-зимски сесии по договор (5-7 дена)
На работилницата, своите знаења и вештини во документаристиката ќе ги споделат членови на креативниот тим на „МакеДокс“, ланските докуникулци и пријателите на фестивалот од други земји – докажани докупрофесионалци.
„Учеството е бесплатно. Трошоците за сместување, превоз и храна се покриени, но имај на ум дека сместувањето – особено за време на Патувачкото кино – не е во хотел со пет ѕведзички, туку понекогаш дури и под отворено небо, со милион ѕвезди, заедно со тимот на „МакеДокс“.
Бараме млади луѓе, храбри да се изразат креативно и слободно и спремни да се впуштат во незаборавна авантура. Дванаесетмината величествени ќе бидат поделени во 3-4 помали групи со по еден ментор, а на крајот на работилницата, секоја група ќе треба да има готов креативен документарен филм (Во овој момент, не бери гајле за опрема)“, се вели во повикот.
Доколку лицето е малолетен/на, заедно со пријавите, треба да достави и согласност од одговорен возрасен со која се одобрува учество на работилницата.
„Патувачкото кино е неделив дел од ‘МакеДокс’ кој се случува низ руралните средини во Македонија“, велат од „МакеДокс“.
