Петтото издание на младинското книжевно читање „Клинци“ ќе се оджи в петок (20 декември) во кафе-книжарницата „Буква“ во 20:30 часот.
Овој пат своја поезија и проза ќе читаат Дамјана Видическа, Теодор Тасевски, Милена Сиљаноска и Андреј Медиќ Лазаревски. Модераторка ќе биде Марија Велинова.
„Некои ќе речат, а можеби и ќе викнат, гордо ќе кажат дека овие млади се „безљубовни и незанесени“. Инспирирани, испровоцирани, поттикнати од таквите мудри изреки, ги започнавме книжевните читања наречени ‘Клинци’. Секое издание ве запознаваме со четворица автори и авторки кои се дел од младинската книжевна сцена, ве запознаваме со нивната поезија и проза, а секое издание ќе биде дополнето и со изложба!“, велат од младинското здружение „Култура Бета“ кои се организатори на настанот.
Изложба ќе имаат Skopje Collage Collective со избор колажи од нивните предизвици изработени од: Јане Вељаноски, Николета Георгиевска, Мартина Даниловска, Филип Зарков, Ива Јованова, Теодор Јуруковски, Андреј Медиќ Лазаревски, Катерина Мандариќ, Стефан Назифовски, Димитар Назифовски, Марко Трпески.
