Во својата реакција по повод вчерашниот и најнов случај на фемицид во земјава, кога во Кочани жена беше избодена до смрт, иако претходно го пријавувала сторителот за уцена и барала заштита, од Платформата за родова еднаквост велат дека се згрозени, како и дека се сомневаат дека институциите не постапиле според своите надлежности.
„Не, не станува збор за немил или трагичен настан, како што известија некои медиуми, туку станува збор за убиство, фемицид, којшто како таков треба да биде квалификуван и претставуван во јавноста. Затоа што ниту е трагичен случај, ниту е немил настан, туку е убиство на жена – фемицид и е најсериозниот вид на родово
базирано насилство“, велат од Платформата, барајќи одговорност.
Оттаму велат дека е очигледно дека жртвата не добила соодветна заштита и дека системот на заштита потфрлил, особено заради тоа што вознемирување повеќе пати било пријавувано од страна на жртвата. Од Платформата истакнуваат дека односот меѓу осомничениот и жртвата во овој случај воопшто не е значаен, затоа што станува збор за родово базирано насилство.
„Ова навистина отвора сомнеж за тоа дали соодветно и со должно внимание било постапувано од страна на институциите и дали пријавите што ги поднела жртвата биле третирани како пријави за родово базирано насилство и дали биле преземени сите соодветни мерки, како од полицијата, затоа што жртвата пријавувала во полиција, така и од обвинителството, но и од центарот за социјални работи, како институции кои што треба да пружат заштита на жртвите на родово базирано насилство“, се вели во реакцијата.
Од Платформата за родова еднаквост потсетуваат дека пред месец се случи фемицид и во Куманово со две жртви кои исто така неколку пати пријавувале насилство, но и во тој случај институциите не реагирале со должно внимание, навремено и според своите надлежности.
„Сето ова покажува дека нивото на свесност и на знаење се’ уште е ниско и дека навистина има потреба од зголемување на капацитетите на институциите да постапуваат во овие случаи, затоа што повторно се случува фемицид и веќе не смееме повторно во иднина да се соочуваме со овој проблем“, посочуваат оттаму.
Според Платформата, и овој случај го потврдува сознанието дека сите напори за справување со овој проблем се недоволни ако не се придружени со соодветно институционално постапување.
„Ваквото постапување во случаи на родово базирано насилство само дополнително го зголемува и онака високиот степен на недоверба во надлежните институции. Сето ова значително влијае граѓаните да бидат демотивирани да го пријават насилството, што пак директно ја зголемува веројатноста насилството да кулминира со убиство“, се вели во реакцијата.
Од Платформата истакнуваат дека секоја трагична смрт на жена само зашто е жена, ги остава со горчливото сознание дека сите напори на граѓанскиот сектор за справување со овој проблем (подигнување на свеста, поддршка за жртвите на насилство и застапување за системски промени) се едноставно недоволни ако не се придружени со поширока институционална и општествена акција.
„Семејното и родово базираното насилство не е приватна работа. Очекуваме дека институциите соодветно ќе ја завршат својата работа во однос на понатамошното постапување по случајот и дека правилно ќе го квалификуваат делото како убиство при вршење родово базирано насилство. Она на што укажува овој и бројни други случаи е потребата институциите да започнат да работат и во рамки на својата превентивна улога за заштита од родово базирано насилство, со цел овие случаи да немаат вакви фатални завршници“, велат од Платформата.
Оттаму ги повикуваат медиумите со должно внимание да известуваат за овој случај, особено ако се земат предвид коментарите што се читаат по објавите на оваа вест, дополнувајќи дека нивната содржина е исто загрижувачка и показател дека и јавноста има потреба од зголемување на знаењата во однос на родово базираното насилство и фемицидот.
