Екипите на ЈП „Комунална хигиена“ во периодот јануари – јуни 2018 година собрале и транспортирале вкупно 74.301 тон комунален отпад од скопските домаќинства, или просечно по 411 тони дневно, информираат од Град Скопје за шестмесечниот извештај за работата на претпријатието. Од Градот додаваат дека се направени 14.649 тури, односно во просек по 81 тура дневно. Во однос на 2017 година количеството на собран и транспортиран отпад во 2018 година е поголемо за 1.887 тони, како и бројот на турите кој е погoлем за 340 тури.
Во овој период, расчистени биле и 855 кубни метри диви депонии составени од градежен шут, земја, гранки и отпадоци, на територијата на општините Гази Баба, Чаир, Кисела Вода, Аеродром и Бутел. Од страна на Еко-патролата дополнително биле откриени и расчистени 485 кубни метри разновиден комунален отпад на повеќе локации низ градот.
„Во Центарот за селекција на отпадот на ЈП „Комунална хигиена“ во Карпош беа расчистени 300 тони кабаст отпад насобран во акциите за чистење на скопските општини во текот на изминатите три години. Во таа насока, Градот Скопје и ЈП „Комунална хигиена“ ги информираа граѓаните својот кабаст отпад (застарен мебел, електронски и електричен отпад) да го одлагаат во Центрите за селекција на отпадот во Карпош и во Вардариште, како и во претоварната станица во Шуто Оризари, што претпријатието го нуди без наплата. Доколку граѓаните имаат потреба подигањето на отпадот да се изврши со специјалните возила на претпријатието, услугата може да ја побараат на бесплатната телефонска линија – 080022233 и истата изнесува 893 денари со пресметан ДДВ“, информираат од Град Скопје.
Во соопштението се додава и дека во првите шест месеци од годинава вкупно 207 дотраени контејнери биле заменети со нови садови за отпад на 38 локации во општините Ѓорче Петров, Карпош, Центар, Чаир и во Кисела Вода.
За поефикасно работење на јавното претпријатие набавени биле две возила – едно товарно моторно возило кипер со капацитет на сандакот до 10 кубни метри, со вградена кранска рака, како и едно специјално возило наменето за заловување и транспорт на бездомните кучиња од скопските улици, што ќе се употребува од страна на специјализираната Служба за хуман третман и контрола за заловување на бездомните кучиња коишто се транспортираат во стационарот „Вардариште“, посочуваат од градската власт.