Повеќе од 30 државни факултети на четири универзитети во Србија официјално се под блокада. Студентите бараат објавување на целосна документација за реконструкцијата на Железничката станица во Нови Сад, како и откривање на одговорните за нападот врз студентите на ФДУ, пренесува Н1.
Кон блокадата вчера се приклучија и студентите од Економскиот факултет во Суботица на Универзитетот во Нови Сад и Факултетот за образование на наставници на Универзитетот во Белград.
Универзитетот во Белград соопшти дека силно ги поддржува студентите во првичните барања што ги поставуваат како самосвесни и академски граѓани, особено нагласувајќи ја подготвеноста на студентите да реагираат на настани од јавно и општествено значење.
Блокадите почнаа на крајот на ноември, по нападот врз студентите на ФДУ додека оддаваа почит во траење од 15 минути за 15-те жртви при падот на настрешницата на Железничката станица во Нови Сад.
Блокадите на студентите добија поддршка и од професори, активисти и политички партии, но и граѓани кои им носеа храна и пијалоци.
За време на неодамнешната акција на Електротехничкиот факултет во Белград, студентите порачаа дека секојдневните блокади ќе престанат кога ќе се исполнат сите барања на студентите. Додаваат дека е можна радикализација на акциите.
