Како резултат на проектот Пристапно дигитално образование за ученици со аутизам и интелектуална попреченост: Иновативни решенија и подобрување на компетенциите на едукаторите (ISEC-ADE) развиени се „TeachSpace“ – иновативна веб-апликација за интерактивно учење како и „TeachHub“ – платформа за споделување и соработка меѓу едукаторите, што ќе им го олеснат напредокот во образованието на децата со посебни образовни потреби. Тие беа презентирани денеска на завршниот настан за проектот во Скопје.
За наставниците, специјални едукатори и образовни асистенти во рамки на проектот се изработени и Методолошки прирачник и програма за нивна обука, а на настанот беше презентиран и Извештајот од спроведеното истражување со препораки за подобрување на пристапноста во дигиталното учење за лицата со аутизам и интелектуална попреченост.
Стратешка цел на Министерството за образование и наука е да обезбеди квалитетно инклузивнo образование на сите нивоа, но кога инклузивното образование ќе се спушти од документите во училниците, се јавуваат низа предизвици, посочи министерката Весна Јаневска.
„Се водиме од потребите на граѓаните и во надминувањето на овие потешкотии. Министерството работи на подобрување на концептот на инклузија, за што сите засегнати страни ќе можат да го кажат своето мислење преку јавни дебати. Веќе на јавна дебата е новиот Закон за средно образование, кој од средината на минатиот месец е објавен на ЕНЕР. Со него се предвидува ангажирање на образовни асистенти и во средните училишта. Во основните училишта, во учебната 2024-2025 година се ангажирани над 1.000 образовни асистенти“, рече министерката.
За да се подигне степенот на инклузивност на македонскиот образовен систем, Министерството работи и на обезбедување поголема пристапност на училишните објекти за учениците со попреченост, на обезбедување наставни помагала и опрема, како и на подигнување на професионалните компетенции на наставниците за работа со ученици со посебни образовни потреби.
Министерка Јаневска рече дека посебно ќе се заложи за унапредување на инклузивното образование, затоа што децата со посебни образовни потреби не смееме да ги идентификуваме со нивната дијагноза, туку со нивните потенцијали што можат да се развијат со помош на образованието. Повика сите заедно да работиме на подигнување на општествената свест за прифаќање на различностите и вклучување на децата и другите лица со атипичен развој во сите активности, а не нивно исклучување.
Проектот ISEC-ADE, со поддршка од програмата Еразмус+ на Европската Унија, го реализира меѓународен конзорциум партнери меѓу кои Аутизам Институт и Македонско научно здружение за аутизам.
