На 12 април (среда) во Мултимедијалниот центар Мала станица на Националната галерија ќе се одржи промоцијата на книгата „Ветерната Приказна“ на Ника Гавровска.
Со почеток во 19 часот, промоцијата ќе биде придружена и со изложба на илустрации за книгата на Наташа Андонова.
„Свет на густа памучна магла. Малата Верта и нејзиниот дедо живеат во светилникот на Ветерниот залив, а Ветерот никаде го нема, освен во приказната што дедо ѝ секоја вечер ѝ ја раскажува, приказната за денот кога Ветерот исчезнал. Тоа е истата приказна во која е втемелена митолошката матрица за Големиот Почеток, за преобразбата на јазикот, за песната на китовите, за Ветерните и за раѓањето на Ветерот. Не очекувајте го во ‘Ветерната приказна’ традиционалениот судир меѓу Доброто и Злото. Силата на природата никогаш не може да биде зла, но и природата на човекот, не е секогаш добра“, се посочува во најавата за настанот.
„Ветерната приказна“ припаѓа на современата книжевна фантастика, велат организаторите и додаваат дека како спој од мит и сказна, таа е и книжевна адаптација на документаристичка предлошка.
„Покрај обземеноста на авторката од значајните современи егзистенцијални прашања за човековата одговорност, кон заедницата и кон природата, „Ветерната приказна“ е сепак четиво на универзални теми во кои се кријат заедничките желби и судбини на човештвото, како што се осаменоста, дарежливоста, љубовта и заборавот. Токму потрагата по трајни вистини и вонвременски пораки ја прави „Ветерната приказна“ современа сказна, а илустрациите на Наташа Андонова како интегрална компонентна на авторската замисла ја преобразуваат во уникатна графичка новела за млади читатели втурнати во повеќеслоен предизвик на читање на вербалната и визуелната порака и надвор од страниците на книгата“, се додава во најавата за настанот.
Ника Гавровска е главен уредник на издавачката куќа „Гаврош“, книжевен преведувач и раскажувач на приказни за деца. Автор е и на сликовницата „Бел“, илустрирана од Ристо Аврамовски, илустрираната бајка „Бамбино“ во соработка со Никола Радуловиќ и визуелниот зборовник „Збор по збор“ со Наташа Андонова.
Наташа Андонова е ликовна уметница, илустраторка, костимографка и сториборд артист. Автор е на илустрациите на „Страшна ноќ“ од Славко Јаневски, „Светот на кукларството“ од Љубица Велкова и „Збор по збор“ од Ника Гавровска.
Ветерната приказна“ е дел проектот Патиштата на хероите поддржан од програмата Креативна Европа на Европската Унија.
