Промоцијата на втората поетска збирка од Моника Стојановска „На крајот сѐ ќе биде како што треба“ ќе се одржи во кафе-книжарницата „Буква“, на 7 ноември, четврток, со почеток во 19 и 30 часот.
„Во нејзиниот нов поетски ракопис, со нејзината веќе препознатлива поетика, Стојановска постигнува уште повисоко естетско рамниште. Во однос на квалитетот на творечкиот резултат, таа очигледно не е во натпревар со другите, туку самата со себе. Во оваа поетска книга се издвојуваат исклучителни песни, меѓу кои за некои и без задршка може да се констатира дека се антологиски, дури и во контекст на најновите тенденции и вредности во македонскиот стих на XXI век“, вели Иван Антоновски во рецензијата за ракописот „На крајот сѐ ќе биде како што треба“.
Промоторка на збирката ќе биде Катарина Величковска, а поетската збирка е во издание на издавачката куќа „Полица“.
