Четиријазичната стихозбирка „Македонски погледи / Sguardi macedoni / Miradas macedonias / Macedonian glances“ од авторите Ернесто Ередеро дел Кампо и Марио Де Роза ќе биде промовирана во среда (21 јуни) во кино „Фросина“ во Младинскиот културен центар ‒ Скопје.
„Поетско патување на двајца дипломати и пријатели. Дијалог на погледи, јазици и емоции низ оваа прекрасна земја“, се вели во најавата.
Настанот ќе започне во 18:30 часот, книгата ќе ја промовира Владимир Мартиновски, модератор е Јулијана Величковска. Стиховите на македонски ќе ги чита Христина Цветаноска која воедно е и преведувач од италијански на македонски.
Во креирањето на збирката учествуваат Климентина Ѓорѓиоска, како преведувач од англиски и шпански на македонски, Јасмина Никуљска Велковска како преведувач од шпански на македонски и Маја Краљевска како автор на фотографиите во книгата.
Ернесто Ередеро дел Кампо e дипломат по професија, филозоф по образование и уметник по вокација. Како филозоф, неговите главни теми на проучување биле скептицизмот и делата на Емил Чоран и на Лудвиг Витгенштајн. Како дипломат, тој ѝ служел на Шпанија во голем број земји. Последната, Северна Македонија. Соработува како предавач со Филозофското друштво на Македонија, а ова е негова втора стихозбирка објавена на македонски јазик.
Марио Де Роза е италијански писател и поет од полуостровот Соренто. Тој е дипломат и моментално Заменик-шеф на мисијата на Италијанската амбасада во Северна Македонија, докторирал административно право и соработува со неколку универзитети. Покрај дела од правната област, има објавено и четири стихозбирки со наслов „И, конечно врне…“ (Бастоги, 2008), „Линии и граници“ (Монтедит, 2010), „Херои без ровови“ (Тигулиана, 2017), „Светулки и комарци“ (2020, последната заедно со уметникот и поет Алдо Терминиело), добивајќи награди на национални и меѓународни литературни конкурси.
