Со почеток во 20 часот, на 26 мај (четврток) на платото пред Младинскиот културен центар (МКЦ) во Скопје ќе биде промовирана стихозбирката „Секој секому огледало“ од Андреј Ал-Асади.
Промотор на книгата во издание на „ПНВ Публикации“ ќе биде Лидија Капушевска-Дракулевска, а настанот ќе го модерира Јулијана Величковска.
„’Секој секому огледало’ е време исполнето со смисла. Во оваа книга поезијата повторно пее во ритам и во рима, убавиот македонски јазик е оживеан, на старите подзаборавени зборови им е најдено ново место. Андреј Ал-Асади ем знае што прави ем знае како да го направи тоа. Необична, разиграна книга, а пак сериозна, баш каков што го знам и Андреј – сериозен, строг, со опасна смисла за хумор и со насмевка под мустаќ!“, вели писателот Ѓоко Здравески.
Според поетот Славе Ѓорѓо Димоски, авторот Андреј Ал-Асади „со сигурни чекори го освојува врвот на современата македонска поезија“, а цврст доказ за тоа вели дека е стихозбирката „Секој секому огледало“.
„Станува збор за прочистена и зрела книга, со рафиниран израз и „особен“ поетски јазик. Сите песни се длабоко промислени, експресивни, со амбиција да ги продлабочат и прошират видиците на поетскиот свет. Во нив се препознава вистински мајстор, кој поетските синтагми ги спојува во најубавите и најасоцијативните слики во современата македонка лирика. Поетот апострофира низа податоци, дури и детали од културниот, историскиот, менталниот склоп и со личните, внатрешните превирања, стиховите ги сместува во најфиниот простор помеѓу сетилното и артрикулацијата на мислата. Станува збор за исклучителна поетска книга“, вели тој.
Ал-Асади дипломирал на Економскиот факултет при Универзитетот „Св. Кирил и Методиј“ во Скопје. Автор е на стихозбирките „Midnight Blues“, објавена во 2013, „Под дервишовото сиќе“ објавена во 2018 година и „Небесна геометрија“, објавена во 2019 година, со кои влезе во најтесен избор за наградата „Браќа Миладиновци“ што ја доделуваат Струшки вечери на поезијата.
„Автор е и на збирките раскази ‘Друго минато’, за која во 2018 г. ја доби наградата за дебитантски прозен ракопис ‘Новите’ од ‘Темплум’, и ‘Утрото на бессоните’ (2021, Бегемот). Учествувал на повеќе поетски читања и фестивали, меѓу кои: Поетска ноќ во Велестово и Струшките вечери на поезијата. Негови песни се преведени на англиски, на арапски, на српски, на хрватски и на италијански јазик“, се додава во најавата за настанот.
