Во Кинотеката на Северна Македонија утре (23 ноември, четврток) ќе се одржи настан во чест на македонскиот поет Ацо Шопов. На настанот ќе бидат промовирани три книги инспирирани од неговото творештво и ќе бидат прикажани четири анимирани филмови според четири негови песни.
Ќе се одржи промоција на книгите „Од онаа страна на Небиднината – Разговори со Светлана Шопова за Ацо Шопов“ од Иван Антоновски, „Ацо Шопов: Песна над песните – Избор од поезијата, размислите, критиките и архивскиот материјал“ од Јасмина Шопова и „Небиднина – графички омнибус“, од Жарко Иванов, Иван Ивановски, Владимир Лукаш и Крсте Господиновски.
Ацо Шопов ја објави збирката „Небиднина“ пред точно шеесет години. Денес, Небиднината се појавува како централна оска во книгата на Иван Антоновски „Од онаа страна на Небиднината – Разговори со Светлана Шопова за Ацо Шопов“. Небиднината е еден од можните влезови и во втората книга која ќе се промовира на овој настан: „Песна над песните“, избор во кој поезијата на Шопов се чита во светлината на неговите размисли за литературата и за општеството, како и на критичките осврти кон неговото творештво(„Сигмапрес“). Преку Небиднината, Жарко Иванов, Иван Ивановски, Владимир Лукаш и Крсте Господиновски фрлаат еден свеж, смел и невообичаен поглед врз поезијата на Шопов во нивниот двојазичен графички омнибус насловен „Небиднина / Not-Being“, се вели во најавата.
По промоцијата ќе бидат проектирани омнибус анимирани филмови во режија на Иван Ивановски, Крсте Господиновски, Владимир Лукаш и Жарко Иванов со кои беше отворен и годинешниот Флипбук Филм Фестивал.
Настанот ќе започне во 19 часот.
