Овој пат во рубриката #РаскажиМи читаме пет кратки раскази од Горан Петревски.
Недела
Недела е ден за одмор. Домаќинките прават колачи или ги метат дворовите. Децата се капат или реашаваат задачи. Обично, времето се погаѓа убаво. Мажите гледаат фудбал на телевизија. На тротоарот седи едно осамено дете и кога ќе го прашаат што му е, тоа одговара:
– Не сум задоволен од животот.
Миле Гркот
Миле гркот не знаеше да мрази. Секогаш беше добар со луѓето и не можеше да забележи дека секој го дупи како што ќе стигне. Отворено го заебаваа, а тој трпеше. Еден ден тивко исчезна. Добрината е штетна по здравјето.
Историјата на бесот
Добро, ќе ви ја кажам вистината: Пред да се родам, бев дух. Живеев во Зимбабве, но не ми одговараше климата. Инаку, сега сум среќно оженет. Жена ми беше Мис на Албанија во 1984. Имаме две деца – вампирчиња. Секој ден гладуваме и играме лото. Водиме љубов и мислиме на Револуцијата. Ете така.
Историја
Веќе две илјади години, луѓето секој ден се раѓаат и умираат, но сè уште тие не се ниту чекор поблиску до она што им беше ветено
Стариот Бетовен
Глув сум или само се правам дека не ја слушам музиката?
***
Горан Петревски е роден во 1970 година. Дипломирал на Економскиот факултет при Универзитетот Св. Кирил и Методиј во Скопје во 1993 година. Во 1998 година, магистрирал на истиот факултет, на студиумот по монетарна економија, а докторирал во 2004 година на тема од монетарната политика. Во 2004 година со кусиот роман „Порнографија (Прирачник за практичен живот)“ победи на конкурсот на Скопски саем за најдобра дебитатска книга. Во 2010 година ја објавува збирката раскази „Совршено кратки раскази“, а во 2014 година го објавува делото „Одбрани трудови“ и двете во издание на издавачката куќа „Темплум“. Работи како професор на Економскиот факултет во Скопје.
Радио МОФ почна со рубриката #РаскажиМи, каде секој петок објавуваме по еден расказ на македонски јазик. Со рубриката целиме да промовираме домашни и странски автори кои пишуваат, односно се преведени на нашиот мајчин јазик. Истовремено, сакаме да придонесеме во популаризацијата на прозата на македонски јазик.
Сите заинтересирани за објавување на свој расказ во рубриката #РаскажиМи своите дела може да ни ги испратат на info@radiomof.mk, заедно со куса биографија. Расказите и преводите треба да бидат на македонски јазик.
