Репортери без граници (РСФ) повика на независна истрага за убиствата на двајца новинари во Сирија, пишува „Анадолу“.
Сирискиот новинар Анас Алхарбутли беше убиен во воздушен напад на Башар ал Асад во западна Сирија во средата, а Мустафа ал Курди, дописник на информативната веб-страница Фокус Алепо, беше застрелан од војниците минатата недела.
„Тероризирањето на медиумските работници е воено злосторство“, изјавија од РСФ и од Сирискиот центар за медиуми и слобода на изразување (СЦМ) во заедничката изјава во четвртокот.
„РСФ и СЦМ бараат независни истраги за да се идентификуваат и изведат пред лицето на правдата сторителите на овие две убиства“, се додава.
Џонатан Дагер, шеф на Бирото за Блискиот Исток на Репортери без граници, изрази страв дека „овој конфликт ќе предизвика поголемо насилство врз новинарите, бидејќи се чини дека ќе потрае“.
„Мора веднаш да се покренат независни истраги за да се утврди кој е одговорен за овие злосторства и да се изведат пред лицето на правдата. Овие двајца репортери беа идентификувани како новинари и нивните убиства ќе претставуваат воени злосторства“, рече Дагер и потсети дека 194 новинари биле убиени додека биле на должност од 2011 година во Сирија.
Менаџерот за програми на СЦМ, Јара Бадер, рече: „Ниту една страна во каков било конфликт, без оглед на нејзините цели, не може да ги користи непријателствата како штит за да ја избегне одговорноста за таргетирање на новинари, занемарување на нивната заштита или покажување попустливост кон сторителите“.
Таа го критикуваше и постојаниот неуспех на меѓународната заедница да ги повика одговорните за нападите на новинарите во Сирија“, што „постави опасен преседан, охрабрувајќи ги другите да го следат примерот – од Украина до Палестина“.
Судирите меѓу силите на сирискиот режим и антирежимските групи првпат избувнаа на 27 ноември во западните села на Алепо.
До 30 ноември, опозициските сили презедоа контрола над поголемиот дел од центарот на градот Алепо и воспоставија доминација низ провинцијата Идлиб.
На 1 декември, опозициската Сириска национална армија ја започна операцијата Зора на слободата против терористичката група ПКК/ЈПГ во областа Тел Рифаат во селата на Алепо, ослободувајќи ја областа од терористичките елементи.
