Руската новинарка Оксана Баулина била убиена при бомбардирање од руската армија на украинскиот главен град Киев.
Баулина известуваше од Киев и од Лавов за истражувачкиот портал „Инсајдер“, соопштија од медиумот. Таа загинала додека ги снимала штетите направени во квартот Подил, пренесе Би-Би-Си.
Баулина претходно работела за анти-корупциската организација на рускиот опозиционер Алексеј Навални и ја имаше напуштено Русија.
Минатата година оваа организација беше прогласена за нелегална и етикетирана како екстремистичка од руските власти, што принуди многу вработени да ја напуштат Русија.
Во бомбардирањето загинало уште едно лице, додека две лица биле повредени.
Истражувачкиот новинар Алексеј Коваљов оддаде почит на Баулина, нарекувајќи ја „новинар со феноменално чувство за моралност“.
And now it’s someone I’ve known for 16 years and worked with at several independent outlets. Oksana Baulina, a Russian journalist with phenomenal sense of moral clarity, killed by Russian rocket fire on a reporting mission in Kyiv today. I’m yet to process this. pic.twitter.com/eUPuMoUw54
— Alexey Kovalyov (@Alexey__Kovalev) March 23, 2022
Баулина е последната од пет новинари кои досега беа убиени во војната во Украина. На почетокот на месецов загина камерманот Јевгени Сакун, од украинската телевизија „Лајв“ при бомбардирање на телевизиската кула во Киев, а две недели подоцна убиен беше и новинарот и филмаџија Брент Рено. Два дена потоа загинаа и двајца новинари кои работеа за американскиот канал Фокс Њуз – Олександра Кувшинова и Пјер Закржевски, кога врз нивното возило било пукано во предградијата на Киев.
