Главниот град на Босна и Херцеговина, Сараево е рангиран за најзагаден град во светот според податоците на технолошката компанија за квалитет на воздухот „IQAir“, јавува Евроњуз. Во неделата, нивото на загаденост во градот беше над 17 пати повисоко од годишното упатство на Светската здравствена организација.
Властите им наложија на жителите да носат маски на отворено, да користат прочистувачи на воздух во домовите и да ги затвораат прозорците.
„За неколку дена ќе имаме средба со големите европски градови кои се соочуваат со слични проблеми и ќе разговараме за краткорочен акционен план за ситуации на прекумерно загадување на воздухот“, изјави официјално лице на градот.
Сараево не е единствениот босански град кој има проблеми со лошиот квалитет на воздухот. Загадувањето на воздухот е проблем и во Зеница и Тузла.
Во 2020 година, СЗО изјави дека Босна и Херцеговина е една од најзагадените земји во Европа. Загадувањето на воздухот предизвикува голем број на предвремени смртни случаи кои изнесуваат околу 79.8 на сто илјади жители.
