Минатата година 346 жени ја изгубиле битката со ракот на дојка во Северна Македонија. Меѓутоа, експертите од оваа област нагласуваат дека раното откривање ја спречува болеста, затоа самопрегледите и лекарските прегледи треба да бидат редовни, пишува Порталб.мк.
Во Македонија во периодот од 2017-2021 година, ракот на дојка зазема прво место по бројот на нови случаи на малигни неоплазми кај жените.
Ракот на дојка е и најчестата причина за смрт од малигни неоплазми кај жените во периодот од 2010-2023 година.
Од 2017 до 2021 година регистрирани се 4.002 случаи на рак на дојка.
Од 2017 до 2021 година, во Македонија од рак на дојка починале 2.234 жени.
Онкологот Весна Атанасовска Колевска вели дека во последно време забележано е зголемување на бројот на заболени од канцер на дојка.
„За жал, фреквенцијата на нови случаи се зголемува насекаде, па и кај нас, а старосната граница е сè помала и помала. Раната дијагностика, односно скринингот е од големо значење за нас бидејќи има голема улога за нас“, рече Колевска.
Радиологот Арѓенд Имери вели дека степенот на здравствена едукација на населението не е задоволителен и остава простор за понатамошна работа во однос на информирањето за ракот на дојката.
„Единствен признаен начин од Светската здравствена организација кој ја намалува смртноста од болеста е раното откривање на болеста и тоа се прави само со редовни и периодични прегледи“, рече Имери.
Во светот месец октомври е познат како месец за подигање на свеста за ракот на дојка, експертите од оваа област велат дека „борбата“ со оваа болест е секојдневна.
„Кампања не треба да има само во месец октомври, туку во текот на целата година, бидејќи знаеме дека ракот на дојка е најчеста причина за смрт кај жените и на него треба да се внимава не само во месец октомври, туку во текот на целата година“, вели Колевска.
Министерството за здравство започна национална кампања „Розевиот караван на октомври – превенцијата е најдобра заштита“.
Главна активност на кампањата е одржувањето на јавни трибини модерирани од панелисти експерти, лекари во јавните здравствени установи низ државата, со цел подигање на свеста за важноста од превенција и рана дијагноза на ракот на дојка.
Во рамки на кампањата ќе бидат организирани едукативни сесии, збогатени со промотивни едукативни материјали и консултации со експерти, како и пријавувања на веб страната https://skrining.zdravstvo.gov.mk/home , со цел на жените да им се обезбедат информации и поддршка за редовни превентивни прегледи.
Во продолжение е распоредот на трибините кои ќе ги модерираат лекари – специјалисти од оваа област, кои се членови на националната комисија за скрининг на рак на дојка.
- На 17 октомври, во Клиничката болница во Штип – 13:30, Д-р. Јасмина Чабуковска
- На 18 октомври, во Општата болница во Кавадарци – 13:30, Д-р. Светлана Темелковска.
- На 21 октомври, во Општата болница во Струга – 13:30, Д-р. Маја Јакимовска – Димитровска.
- На 25 октомври, во Општата болница во Kуманово – 13:30 Д-р. Маја Јакимовска.
- На 28 октомври, во Клиничката болница во Битола– 13:30, Д-р. Тања Петровска.
- На 29 октомври, – во 13:30 часот, сала на Општата болница во Велес, Д-р. Тања Петровска.
Во 2022 година во светот на 2,3 милиони жени им е дијагностициран рак на дојка, а 670.000 починале.
Се препорачува секоја жена над 25 години да направи скрининг еднаш годишно, а за жените над 40 години два пати годишно.
Иако ретко, ракот на дојка е регистриран и кај мажите, односно околу 1% од случаите на рак на дојка се регистрирани кај мажите.
