Шумскиот пожар во регионот Александрополи во Грција е најголем кој бил регистриран во историјата на Европската Унија и за него се мобилизирани речиси половина од воздушните противпожарни служби на Унијата, информираше портпаролот на Европската комисија Балаж Ујвари.
Единаесет авиони и хеликоптер од ЕУ дојдоа на помош во гасење на огнот на северот од градот Алекандрополи, заедно со 407 пожарникари, рече Ујвари.
Largest wildfire 🔥 in Europe on record ongoing in Greece 🇬🇷
Robust EU 🇪🇺 response with 12 firefighting aircraft + 100s of👨🚒 mobilised by @EU_Commission ⤵️ pic.twitter.com/PQVy48A4Uk
— Balazs Ujvari (@balazs_iravju) August 29, 2023
Од службите за граѓанска заштита на ЕУ соопштија дека во пожарот изгорела површина поголема од 810 квадратни километри.
„Овој шумски пожар е најголем во ЕУ од 2000 година, кога Европскиот информациски систем за шумски пожари (Еффис) започна да собира податоци“, соопштија од службата.
Грчките противпожарни единици велат дека пожарот и понатаму е надвор од контрола во североисточниот регион на Националниот парк Дадиа.
Пожарот кој избувна на 19 август досега одзеде 20 човечки животи, од кои 18 беа тела на мигранти пронајдени во регионот кој често се користи за нелегален влез од соседна Турција.
„Знаеме дека пожарите стануваат посериозни. Доколку ги погледнете бројките за секоја од последните неколку години, се гледа тренд кој не е поволен и потребни се повеќе капацитети помеѓу земјите членки на ЕУ“, додаде Ујвари.
Грција беше погодена од повеќе пожари ова лето кои Владата и експертите ги припишуваат на климатските промени.
