Откако е потпишан Колективниот договор (КД) за култура во Република Македонија, секое поместување на минималната плата во месец март за вработените во културата претставува неизвесност дали ќе се почитуваат нивните права, реагираат од Синдикатот за култура на Република Македонија (СКРМ).
Од таму посочуваат дека членот 65 од КД за култура значи усогласување на платата согласно растот на минималната плата. Дополнително, нагласува Синдикатот, на вработените во културата веќе две години им се спорат и 10% кои им следуваат со Општиот Колективен договор за јавен сектор.
Изговорите, како што велат од Синдикатот, се секогаш тенденциозни, неповрзани со правото и лична желба на поединци.
„Очекувајќи дека со промената на политичката ситуација во Република Македонија, кога претходно секој март беше неизвесен, дека условите и работите ќе се променат и вработените во културата конечно ќе здивнат, повторно и овој март сме соочени со неизвесност. Институциите од културата сè уште чекаат насоки од Министерството за култура, што е неразбирливо за нас како Синдикат имајќи ги предвид нивните ингеренции и одговорност согласно Закон. Имаме сознанија дека во две институции веќе се добиени насоки каде не се почитуваат колективните договори и следствено, добиената пресметката би била пониска за 1,5 % од исплатената плата за февруари месец“, посочуваат од
По тој повод, Синдикатот на културата бара од директорите на институциите да ги почитуваат законите во Македонија и да ги спроведуваат одредбите од колективните договори.
„А Министерството за култура како ресорно министерство за сите вработени во културата и социјален партнер на Синдикатот да застане зад вработените во културата во остварување на нивните права од работен однос“, стои во реакцијата.
