Конзерватори и ветеринари предупредуваат дека пластичен отпад на отворена депонија во источна Шри Ланка убива слонови во регионот, откако уште два беа пронајдени мртви изминатиот викенд, јавува АП.
Околу 20 слонови умреле во последните осум години откако конзумирале пластично ѓубре во депонија во селото Палакаду во областа Ампара, околу 210 километри источно од главниот град Коломбо.
Испитувањата на мртвите животни покажаа дека проголтале големи количества неразградлива пластика што се наоѓа во депонија, рече ветеринарот за диви животни Нихал Пушпакумара.
„Полиетилен, обвивки за храна, пластика, други неразградливи материи и вода беа единствените работи што можевме да ги видиме во пост смртните случаи. Нормалната храна што ја јадат и варат слоновите не беше очигледна“, рече тој.
Слоновите се почитувани во Шри Ланка, но се и загрозени. Нивниот број се намали од околу 14.000 во 19 век на 6.000 во 2011 година, според првиот попис на слонови во земјата.
Тие се сè поранливи поради губењето и деградацијата на нивното природно живеалиште. Многу слонови се впуштаат поблиску до човечките населби во потрага по храна, а некои се убиени од ловокрадци или фармери лути поради оштетување на нивните посеви.
Гладните слонови јадат од отпадот во депонијата, консумирајќи пластика, како и остри предмети кои ги оштетуваат нивните дигестивни системи, рече Пушпакумара.
Во 2017 година, владата објави дека ќе го рециклира ѓубрето во депониите во близина на зоните на дивиот свет за да ги спречи слоновите да консумираат пластичен отпад. Исто така, најави дека ќе бидат подигнати електрични огради околу локациите за да ги држат животните подалеку. Но, ниту едното ниту другото не е целосно спроведено.
Според локалните податоци, има 54 депонии за отпад во зоните на дивиот свет ширум земјата, со околу 300 слонови кои шетаат во нивна близина.
Местото за управување со отпад во селото Палакаду беше формирано во 2008 година со помош на Европската унија. Таму се фрла ѓубрето собрано од девет околни села, но не се рециклира.
Во 2014 година, електричната ограда што ја заштитува локацијата беше погодена од гром и властите никогаш не ја поправаа, дозволувајќи им на слоновите да влезат и да пребаруваат низ депонијата. Жителите велат дека слоновите се доближиле и се населиле во близина на јамата за отпад, што предизвикува страв кај околните селани.
Многумина користат петарди за да ги избркаат животните кога ќе залутаат во селото, а некои подигнале електрични огради околу своите домови.
„Но, селаните честопати не знаат како да ги постават електричните огради, така што може да ги загрозат сопствените животи, како и животите на слоновите“, вели Керти Ранасинге, локален селски советник.
„Иако ги нарекуваме закана, дивите слонови се исто така ресурс. Властите треба да изнајдат начин да ги заштитат и човечките животи и слоновите што исто така ни овозможуваат да продолжиме со нашите земјоделски активности“, рече тој.
