Студенти од ФИНКИ ќе му помагаат на МОН да се унапреди дигиталното работење и да се забрза дигитализација на образованието

Студенти од Факултетот за информатички науки и компјутерско инженерство во Скопје,  од денес ќе му помагаат на Министерството за образование и наука (МОН) во унапредување на дигиталното работење и забрзување на процесот на дигитализација на образованието, информираат од МОН.

„Под менторство на нивните професори, ќе дадат поддршка на тековното одржување на дел од информациските системи и дигитални платформи со кои располага министерството и ќе учествуваат во креирање и имплементација на нови техничко – технолошки решенија и дигитални услуги во воспитно – образовниот процес“, соопштува МОН.

Како што објаснуваат од министерството, ова е уредено со меморандум за соработка кој денеска го потпишаа министерката за образование и наука Весна Јаневска и деканот на ФИНКИ Боро Јакимовски, а кој, како што информираа, зависно од потребите и можностите на двете страни, во иднина би можел дополнително да се надградува.

„Согласно договореното, дополнително факултетот ќе организира и спроведува едукативни активности во форма на обуки, работилници и семинари за стручно усовршување на вработените во министерството. Од друга страна, министерството ќе поддржи практично усовршување на студентите од овој факултет. Предвидени се и заеднички стручни и научни истражувања и анализи, како и организација на хакатони и натпревари за младите во информатичко – комуникациската сфера“, рече Јаневска.

Министерката изрази задоволство што лесно беше постигната согласност каде и како да соработуваат двете страни, со што, според МОН, значително ќе се подигне ефикасноста и ефективноста на работењето и на министерството и на факултетот, а во интерес на граѓаните.

Како што рече таа, МОН покажува отвореност, а ФИНКИ висока општествена одговорност, па ги повика и другите јавни институции и високообразовни установи да иницираат ваков тип на соработка.

„Да им дадеме можност на младите да се докажуваат и практично да се надградуваат уште додека студираат и со тоа да им го поедноставиме настапот на пазарот на труд по дипломирањето“, додаде Јаневска.