Универзитетското студентско собрание на Универзитетот „Св. Кирил и Методиј“ во Скопје (УСС УКИМ) денес реагираше на, како што велат, недоволната достапност и отсуството на поволности на меѓуградскиот превоз во земјава. Од таму посочија дека по Ковид-пандемијата, голем дел од автобуските и железничките линии беа укинати, а цените на билетите за оние кои останаа, пораснаа драстично, пренесува агенцијата Мета.мк.
„Ова претставуваше, и сè уште претставува голем удар по студентскиот стандард со што студентите се принудени да плаќаат повисоки цени за превоз до нивниот дом“, изјави на денешната прес-конференција Стефанија Милеска, претседателка на Комисијата за студентски стандард на УСС УКИМ.
„Минатата година до месец јуни беше активна антикризната мерка за сите студенти што имаат постојани живеалишта надвор од нивото место на студирање со што од страна на Министерството за образование им беше исплаќана помош од 1200 денари месечно. Бидејќи оваа мерка повеќе не постои, неопходно е да се воведат итни мерки за подобрување на состојбата со студентскиот превоз во државата“, додаде Милеска.
Преку анкетирање на студентите, УСС УКИМ дошло до сознанија дека цените на билетите се зголемиле и за над 100 отсто во споредба со износите од пред неколку години.
Дел од превозниците не нудат ниту повратни билети, до некои градови воопшто не возат автобуси
Во Охрид, Битола, Кочани, Прилеп, Ресен, Струга, Кичево и Гостивар постојат попусти на студентските билети, но, според УСС УКИМ, тие се исклучок, а не правило. Овие поволности не се достапни за најголемиот дел од студентите кои патуваат во друг град за студии, што создава нееднаквост во пристапот до образование.
„Студентите кои студираат во поголемите универзитетски центри како што е Скопје, а доаѓаат од помали градови или сакаат да се вратат дома за време на викендите или празниците, се приморани да ги плаќаат целосните цени на билетите, без никаков попуст“, велат од УСС УКИМ.
Одредени градови, покрај тоа што немаат попуст за студенти, немаат ниту повратна карта. Таков е примерот со Струмица, каде што билет во еден правец изнесува 680 денари, а бидејќи нема повратен билет, студентите за да патуваат во два правца треба да платат 1.360 денари.
Повратни билети, според УСС УКИМ, нема ниту во Тетово, Куманово, Штип, Велес, Радовиш и Свети Николе.
Студентите од Македонска Каменица, Делчево, Демир Хисар и Крушево, пак, воопшто немаат пристап до меѓуградски превоз со кој ќе можат да патуваат и да се вратат во градот каде што студираат.
Студентите на УКИМ забележуваат и дека по пандемијата, цената на горивата значително се намали, но цените на автобуските билети останаа исти, што според нив, е нелогично и неоправдано.
„Покрај ова, постојат и други нелогичности со кои студентите секојдневно се соочуваат. Таков е примерот со билетот од Скопје до Гостивар, кој изнесува 350 денари во еден правец и повратна карта 550 денари и билетот од Скопје до Радовиш, кој изнесува 530 денари во еден правец и 1060 денари во два правца бидејќи нема повратна карта. Патот Скопје-Гостивар е 70 км и патарините во еден правец изнесуваат 140 денари, а патот Скопје-Радовиш е 105 км и патарините во еден правец изнесуваат 160 денари. Нелогичноста тука може да ја видиме во тоа што големата разлика во цената на билетите не одговара на малата разлика во цената на патарините и во километражата помеѓу овие две релации“, реагираат од студентското собрание на УКИМ.
„Денес, но и скоро деценија наназад, студентите многу полесно и поевтино купуваат авиобилет за во европските земји, отколку автобуски, комби или билет за железнички превоз низ државата. Поевтино е да летаме до Италија отколку да патуваме до Струмица со повратна карта“, додаваат од таму.
„Време е студентите да добијат фер и достапен превоз“
Студентското собрание апелира до властите итно да се отпочне со „конкретни резултати кои ќе водат до видливо подобрување на меѓуградскиот превоз и неговата достапност за сите, особено за студентите од целата држава“.
„Посебно апелираме да се почитува Националната стратегија за млади 2023-2027 усвоена од страна на Собранието на РСМ, во која во четвртата област: образование, под реден број 4.1.1.2 стои мерката: Донесување одлука за намалување цени на меѓуградскиот автобуски превоз за средношколци и студенти на територијата на цела држава и зголемување на редовноста на линиите. Водечка институција за оваа мерка е Министерството за транспорт и врски, а реализацијата на оваа мерка, според оваа стратегија требаше да биде во мај 2024 година“, велат од УСС УКИМ.
Апелираат да се исполнат и барањата на студентите во рамки на Студентскиот Манифест потпишан во 2024 година од страна на најголемите политички партии во државата. Во овој манифест, студентите бараат бесплатен градски превоз за студентите на прв и втор циклус на студии во Битола, Тетово, Штип, Прилеп и Охрид.
„Овозможувањето на подостапен студентски превоз е инвестиција во студентскиот стандард, образованието, мобилноста и иднината на младите во нашата земја. Време е студентите да добијат фер и достапен превоз кој ќе ги поддржи во нивниот академски развој, а не да претставува дополнителна пречка во нивното образование“, велат од Универзитетското студентско собрание на Универзитетот „Св. Кирил и Методиј“.
Мета.мк и Порталб.мк во повеќе наврати изминативе месеци пишуваа за високите цени на автобуските билети за меѓуградски превоз, кои претставуваат финансиски товар, особено за студентите што патуваат редовно.
