Мета, компанијата која е сопственик на Фејсбук и Инстаграм, најави дека на крајот на неделава ќе лансира нова апликација со која ќе бидат конкуренција на Твитер.
За апликацијата, која се вика Тредс (Нишки), од Мета велат дека ќе биде „текстуална апликација за комуникација“ и ќе биде достапна за преземање од четврток, а ќе биде поврзана со Инстаграм.
Неколку слики кои беа објавени покажуваат дека почетната страница изгледа слично на Твитер.
Овој потег е дел од ривалството помеѓу сопственикот на Мета, Марк Закерберг и сопственикот на Твитер, Илон Маск.
Во меѓувреме од Твитер најавија дека популарната апликација „Твит Дек“ ќе започне да се наплаќа за 30 дена. Ова е последен чекор во намерата на Маск да ги натера корисниците да се претплатат на сервисот „Твитер Блу“. Во саботата платформата го ограничи бројот на твитови кои корисниците можат да ги гледаат на дневно ниво, образложувајќи ја ваквата одлука со големиот обем на преземање на податоци од социјалната мрежа.
Според досега достапните податоци, Тредс на Мета ќе биде бесплатна и нема да има никакви ограничувања на бројот на објави кои корисниците ќе можат да ги погледнат.
„Тредс е местото каде заедниците ќе се здружат за да дискутираат на разни теми. Од она што ви е важно денес, до она што ќе биде во тренд утре“, стои во описот на апликацијата.
Последниве години се појавија повеќе апликации кои се многу слични со Твитер, од Трут на поранешниот американски претседател Доналд Трамп, преку Мастодон и Блускај.
Токму Блускај тврди дека имале рекорден сообраќај на платформата откако Маск се одлучил да го ограничи користењето на Твитер во текот на викендот.
Сепак, Тредс може да бидат најголемата закана со која Твитер се соочил досега. Марк Закерберг веќе има историја на позајмување идеи од други компании и нивно успешно реализирање во пракса. Рилсовите на Мета се веќе познати како копија на ТикТок, додека Сторис изгледаат слично на Снепчет. Истовремено Мета има и доволно ресурси за да се натпреварува со Твитер. Тредс ќе биде дел од Инстаграм, па на тој начин веќе однапред ќе биде поврзан со милиони профили, што значи дека нема да биде почеток од нула како другите конкурентски апликации.
