Годинава во светот се убиени 104 новинари, а повеќе од половина од нив загинале во Газа, покажуваат податоците на Меѓународната федерација на новинари (ИФЈ), пренесува Данас.
Генералниот секретар на ИФЈ, Антони Беланже посочи дека по 129-те смртни случаи регистрирани во 2023 година, „2024 година е една од најлошите години“.
Според ИФЈ, од почетокот на оваа година биле убиени 55 палестински медиумски работници. Од почетокот на војната на 7 октомври минатата година, бројот на убиени палестински новинари е најмалку 138, што ја прави оваа територија „една од најопасните во историјата на модерното новинарство, по Ирак, Филипини и Мексико“, според ИФЈ.
По Блискиот Исток, втора најопасна област за новинарите е азиско-пацифичкиот регион, со 20 смртни случаи, вклучувајќи шест атентати во Пакистан, пет во Бангладеш и три во Индија.
Во Европа, Украина е сè уште опасна земја за новинарите, каде оваа година загинаа четворица новинари.
