Илјадници граѓани вчера се собраа во речиси 20 градови во Словачка на протест против обидот на премиерот Роберт Фицо да го затвори специјалното обвинителство кое ги истражува случаите на организиран криминал и корупција, пренесува Данас.
Демонстрациите кои ги повикаа прозападните либерали, конзервативните опозициски партии и граѓанските активисти се четврти по ред откако премиерот Фицо предложи брза реформа на обвинителството и кривичниот законик во декември, што предизвика загриженост од Европската комисија и САД.
Неговиот план вклучува укинување на Канцеларијата на специјалното обвинителство, која ги истражува случаите на организиран криминал и случаите на корупција, ограничување на заштитата за укажувачите и намалување на казните за финансиски малверзации.
„Постои закана дека правдата за сите ќе се претвори во амнестија и заштита на луѓе блиски до владејачката коалиција, за минати и идни дела“, изјави заменик-претседател на опозициските демохристијани Маријан Чаучик во Братислава.
Демонстрантите на ниски температури се собраа во главниот град, носејќи знамиња на Европската Унија и Словачка, и извикувајќи „Срамота“ и „Доста е од Фицо“. На еден транспарент пишуваше „Опозицијо, обединете се против мафијата“.
Полицијата процени дека во Братислава се собрале околу 20.000 луѓе.
Неколку стотици, а на некои места и неколку илјади луѓе се собраа на протести во други градови.
