Министерството за образование и наука вечер во 21 часот ќе ги објави прашањата за претстојното екстерно тестирање за основните и средните училишта што ќе одржи од 2 до 10 јуни, пренесе МИА.
ФОТО: РСЕ
На интернет страницата prasanjaeksterno.dic.edu.mk ќе бидат јавно достапни вкупно 425.800 прашања од кои 221.900 на македонски и 203.900 на албански, турски и српски јазик. Има прашања за 5.141 предмет во основното образование и за сите струки и насоки во средното образование. Бројот на прашања зависи од застапеноста на предметот во наставниот план.
– За наставен предмет кој е застапен со 1 час неделен фонд во наставниот план за основно и средно образование, изготвени се 100 прашања, за наставен предмет кој е застапен со 2 часа неделен фонд во наставниот план изготвени се 200 прашања и.т.н. Изготвените прашања потоа се проверени и рецензирани од страна на професори ангажирани од Државниот испитен центар, рече министерот за образование и наука Спиро Ристовски на денешната прес-конференција.
Годинава со екстерното тестирање ќе бидат опфатени вкупно 189.037 ученици од четврто одделението во основно образование до трета година во средното образование, како и 18.126 наставници од вкупно 680 основни и средни училишта.
Три дена пред полагањето учениците ќе бидат известени за предметите по кои ќе бидат тестирани, а до 16 мај секој граѓанин ќе има можност да пријави одредена техничка грешка или евентуална нелогичност во прашањата.
Кол центрите на Државниот испитен центар ќе бидат отворени за било какви информации или пријави на техничка поддршка во деновите додека се одвива екстерното тестирање.