Европа претрпе рекордно екстремно време во 2021 година, од најтоплиот ден и најтоплото лето до смртоносни шумски пожари и поплави, објави службата за следење на климата на Европската Унија, јавува „Еурактив“.
Додека површината на Земјата беше речиси 1.2 Целзиусови степени потопла од прединдустриските нивоа минатата година, Европа забележа просечен пораст од повеќе од два степени, праг над кој опасните екстремни временски настани стануваат поверојатни и поинтензивни, објави Службата за климатски промени Коперник.
Најтоплото лето досега се карактеризираше со топлотен бран по должината на медитеранскиот раб кој траеше неколку недели и најтоплиот ден досега регистриран во Европа, односно 48.8 Целзиусови степени на Сицилија.
Во Грција, високите температури поттикнаа смртоносни шумски пожари, опишани од грчкиот премиер како „најголемата еколошка катастрофа во последните децении“.
Поплавите во Германија и Белгија предизвикани од силниот дожд, многу поверојатно од климатските промени, според рецензирани студии, убиле голем број луѓе и предизвикале штета од милијарди евра.
Како што климата продолжува да се загрева, поплавите од овој размер ќе зачестуваат, предупреди службата на ЕУ.
„2021 беше година на екстреми, вклучително и најжешкото лето во Европа, топлотни бранови во Медитеранот, поплави и ветровити суши во западна Европа“, рече директорот на службата Карло Буонтемпо.
„Ова покажува дека разбирањето на временските и климатските екстреми станува сè порелевантно за клучните сектори на општеството“, додаде тој.
