„Првата причина поради која се согласуваме и ја поддржуваме одлуката на Влада за набавка на 120 автобуси е тоа што парите за набавка се од буџетот, не се задолжува државата и не подига кредит за нивната набавка. Но, тоа што сметаме дека е неисправно е што ова се прави дури во април, тоа е веќе четвртиот месец од годината, а државниот буџет беше донесен уште на крајот на минатата година и се знаело дека има доволно финансии за да се набават нови автобуси“, посочуваат од Зелен хуман град (ЗХГ), откако вчера на владина седница беше усвоена информација од Министерството за транспорт за потреба од набавка на еколошки автобуси.
Од граѓанската иницијатива велат дека не им се допаѓа што оваа одлука, донесена на овој начин може да се користи за собирање политички поени и гласови на следните локални избори.
„Не сметаме дека една партија која му мисли добро на нашето општество треба да функционира на овој начин, односно да користи моменти во предизборна кампања за конечно да обезбеди функционирање на еден суштествен сегмент од нашето општество како што е јавниот превоз“, велат од ЗХГ.
Според ЗХГ, неопходноста од редовна обнова на флотата на ЈСП е реалност, што е втората причина зошто ја поддржуваат одлуката.
„Град Скопје имаше реален проблем со јавниот превоз целиот изминат период, дел од тој проблем беа вештачки создадени кризи кои беа производ на меѓупартиски пресметки, а дел од тоа беше и реален недостиг на финансии на претпријатието, недостиг на соодветен кадар кој соодветно ќе раководи со него, проследено со борби внатре во самото претпријатије бидејќи има силна партизација помеѓу вработените, и не само во ЈСП туку во сите јавни претпријатија и на локално и на централно ниво“, забележува ЗХГ.
И едноставно не гледаат како може да продолжи понатаму ваквото функционирање на Македонија кога, велат од таму, се користат основни потреби на граѓаните како механизам за подмитување и купување гласови за локални или централни избори.
„Во градот најмногу финансии се слеваат од градежните активности, од наплаќање даноци и надомест за уредување градежно земјиште и според закон, тие пари така собрани мора и за тоа да се користат, за комуналии, меѓутоа Градот Скопје секоја година пријавува суфицит“, посочува ЗХГ.
Иницијативата што има свои советници во градскиот Совет потенцира дека последната година останале 750 милиони денари, дел од тие пари можеа да се искористат за набавка на неколку нови автобуси, но тоа не се направило.
„Во ваквите меѓупартиски пресметки и борбата на различни политички групации во рамки на Советот за кој ќе ги земе поените за нови автобуси и функционален јавен превоз секогаш жртва ќе бидат граѓаните, бидејќи не се мисли на најдобри решенија за нивните проблеми туку се мисли на личниот углед и слика во јавноста, односно популизмот и опциите за што повеќе гласови, што повеќе функции и што повеќе приграбување моќ“, е ставот на ЗХГ.
