Стотици луѓе се собраа во центарот на Лондон за да ја одбележат годишнината од смртта на Иранката Махша Амини која почина во притвор минатата година. Собраните граѓани извикуваа „Жени! Животот! Слобода!”. Слични собири вчера се одржаа и во Франција, Италија и Германија, пренесува Н1.
Смртта на Амини предизвика масовни демонстрации во Иран и ширум светот минатата година. Амини беше уапсена од полицијата за морал бидејќи се гледала нејзината коса под шамијата која е задолжителна во Иран. Младата Амини почина на 16 септември 2022 година, три дена по нејзиното апсење.
Иранските власти се обидоа да спречат продолжување на протестите на годишнината од нејзината смрт. Нејзиниот татко бил приведен пред неговата куќа откако семејството укажало дека планираат да се соберат на гробот на Амини, рекоа курдските активисти од групата „Хенгав“. Безбедносните сили се засилени во центарот на Техеран и на западот на земјата.
Групата „Хенгав“ соопшти дека е започнат генерален штрајк во областите на земјата каде живеат Курди, а дека активистите ја следат ситуацијата. За тоа нема информации во локалните медиуми. „Хенгав“ вчера извести за широко распространет генерален штрајк во курдските области, испраќајќи видеа и фотографии на кои се чини дека улиците се главно празни, а продавниците затворени.
Инаку, Амини почина три дена откако беше уапсена од полицијата за морал, наводно за кршење на законите со кои се бара од жените да ја покриваат косата на јавно место. Додека властите тврдат дека таа доживеала срцев удар, поддржувачите на Амини велат дека била претепана од полицијата и починала од повредите.
