Здружението на новинари на Македонија (ЗНМ) реагира затоа што медиумските реформи се избришани од владиниот „План за приоритетни реформи 18“.
Од Здружението велат дека им е неприфатливо објаснувањето на Владата дека медиумските реформи ги нема во реформскиот план затоа што измените и дополнувањата на Законот за аудио и аудиовизуелни медиумски услуги поминале владина процедура, потенцирајќи дека усвојувањето на законот за АВМУ во Собранието е заедничка обврска на Владата и на парламентарното мнозинство.
„Ја потсетуваме Владата дека нејзината политичка волја да се бори против политиката на неказнивост на насилството врз новинари не е остварена. Од 59 напади на новинари во изминатите пет години само во два случаи напаѓачите се казнети додека останатите се неистражени, или половично истражени. Неискрено е што Владата се обидува да ги злоупотреби заклучоците на Советот на Европската комисија за изоставување на медиумските реформи од „Планот 18“. Самата Европската Унија нѐ информираше дека заклучоците на Советот во никој случај не значат дека медиумските реформи не се битни за нивната одлука за започнување преговори за членство со Македонија идната година“, наведуваат од ЗНМ.
Здружението бара Владата да ги врати медиумските реформи во „Планот 18“ и сериозно да се посвети на ветувањата дадени на новинарската заедница и на Советот на Европа за корекција на Изборниот законик, кој летоска беше изменет и дополнет без дебата и нетранспарентно.
„Потсетуваме дека давањето можност со јавни пари да се финансира политичка пропаганда на партиите во медиуми за време на изборна кампања значи продолжување на политиката на владино рекламирање од претходниот режим во поинаква амбалажа. Таа мерка ќе ги одржи клиентелистичките врски меѓу партиите и сопствениците на медиумите и ги замолчува медиумите. Законската можност Државната изборна комисија да го следи начинот на известување на онлајн медиумите за време на изборна кампања е апсолутно неприменлива и во спротивност со европските стандарди, кое може да има сериозни последици врз слободата на медиумите“, стои во реакцијата на ЗНМ.
* Оваа содржина е изработена со помош на Европската Унија во рамките на Проектот за
младинско изразување. За објавените содржини е одговорен Младински образовен форум и
истите нужно не ги одразуваат ставовите на Европската Унија.